Mak 14–15; Luk 22–23; Jon 18–19
Oli Arestem Jisas
Oli jajem Pikinini blong God
Afta we Jisas i finis prea mo safa long Getsemane, Juda i kam wetem wan bigfala grup blong ol soldia blong man Jiu. Juda i wan long ol Aposol. Hem i save se Jisas i stap go long karen ia plante taem. Ol lida blong ol man Jiu oli bin pem Judas blong i helpem olgeta blong faenem Jisas blong oli save tekem Hem i gowe.
Jon 18:2–3
Taem ol soldia oli traem blolng tekem Jisas i gowe, Pita i pulumaot wan naef blong faet. Hem i katemaot sora blong wokman blong hae pris.
Jon 18:10
Jisas i talem long Pita blong putumaot naef ia. Jisas i talem se Hem i mas mekem wanem we Papa blong Hem i wantem.
Jon 18:11
Jisas i tajem sora blong wokman ia mo i hilim hem.
Luk 22:51
Ol soldia oli tekem Jisas i go long haos blong hae pris. Ol nara lida blong ol man Jiu oli stap tu long taem ia. Oli wantem faenem wan risen blonng kilim Jisas i ded. Oli tekem ol man i kam blong oli talem ol giaman toktok abaot Hem.
Mak 14:53–61
Afta, hae pris i askem Jisas sapos Hem i Pikinini blong God. Jisas i talem, "Mi ya nao."
Mak 14:61–62
Hemia i mekem hae pris mo ol narafala lida oli kros. Oli slapen Jisas, spet long Hem mo jikim Hem. Oli agri se Hem i mas ded.
Mak 14:63–65
Taem Jisas i stap insaed long haos blong hae pris, Pita i wet aotsaed. Hem i stap sidaon long saed blong faea from ples i kolkol. Tri taem, ol man oli talem se oli luksave Pita se hem i wan long ol disaepol blong Jisas. Be evri taem Pita i talem se hem i no save Jisas.
Mak 14:54, 66–71
Mo afta faol i singaot, mo Pita i tingbaot wanem we Jisas i bin talem: se Pita bae i talem se i no save Hem tri taem. Pita i krae mo i wokbaot i gowe.
Mak 14:72
Ol lida blong ol man Jiu oli tekem Jisas i go long Paelat, Man Rom we i hed blong gavman long ples ia. Plante man tu oli kam. Ol lida ia oli wantem blong Paelat i kilim Jisas i ded. Oli talem long Paelat se Jisas i singaotem Hemwan King blong ol man Jiu.
Mak 15:1–3; Luk 23:2; Jon 18:28–31
Paelat i askem Jisas sapos Hem i King blong ol man Jiu. Jisas i talem, "Mi mi no king olsem ol king blong wol ia." Hem i eksplenem se Hem i kam long wol ia blong tijim trutok long ol pipol.
Jon 18:33–37
Paelat i talem se hem i no ting se Jisas i mekem eni samting we i rong. Be plante man oli singaot se, "Kilim hem i ded." Paelat i jusum blong mekem wanem we oli wantem mo blong kilim Jisas i ded.
Mak 15:12–14; Luk 23:14–24