Jisas I Kamkamaot long Sol

Sol hem i wan Farisi—wan lida blong Ol Jiu we i save gud ol skripja. Be Sol i no bilivim se Jisas i Sevya. Plante taem hem i stap putum olgeta we oli stap folem Jisas, i go long kalabus. Wan dei Sol i bin travel i go long wan siti we oli singaotem Damaskes, blong arestem sam long ol man we oli stap folem Jisas, mo tekem olgeta i kam long Jerusalem blong oli panisim olgeta.

Ol Wok 9:1–2; 22:4–5; 26:5

Taem Sol i stap travel, wan laet i saen daon long hem. Laet ia i saen bitim san. Sol i foldaon i go long graon. Hem i harem wan voes i stap talem, “!Sol! !Sol!” Afta voes ia i askem Sol from wanem hem i stap faet agensem Jisas mo i stap mekem nogud long ol disaepol blong Hem.

Ol Wok 9:3–4; 26:13–14

Sol i askem huia i stap toktok. Voes ia i talem, “Mi Jisas.” Sol i bin fraet mo sapraes. Hem i askem Jisas wanem hem i mas mekem. Jisas i talem long Sol, “Yu girap, yu wokbaot, yu go long taon ya.” Long ples ia, bae hem i lanem wanem nekis samting bae hem i mekem.

Ol Wok 9:5–6

Sol i obei mo i stanap. Be naoia, hem i blaen. Hem i no save luk eni samting. ol pipol we oli travel wetem hem, oli lidim hem i go long siti blong Damaskes. Blong tri dei, Sol i no bin kakae o drink eni samting.

Ol Wok 9:8–9

Ananaeas hem i wan long ol disaepol blong Jisas we i stap laef long Damaskes. Jisas i visitim Ananaeas long wan visen mo i talem long hem blong go mo helpem Sol.

Ol Wok 9:10–12

Be Ananaeas i konfius. Hem i bin harem abaot Sol. Hem i save hamas Sol i bin faet agensem ol disaepol blong Jisas.

Ol Wok 9:13–14

Be Jisas i askem Ananaeas blong helpem Sol nomo. Jisas i talem se Hem i bin jusum sol blong karem gospel blong Hem i go long plante pipol we oli no ol Jiu mo oli no save abaot Jisas.

Ol Wok 9:15–16

Ananaeas i obei long Jisas. Hem i faenem Sol mo i givim wan blesing long hem. Ananaeas i singaotem hem “Brata Sol.”

Ol Wok 9:17

Ananaeas i talem se Jisas i bin sendem hem blong mekem se Sol i save kasem hiling mo bae i fulap long Tabu Spirit. Kwiktaem nomo, Sol i save lukluk bakegen.

Ol Wok 9:17–18

Sol i kasem baptaes. Hem i tijim evriwan long siti abaot Jisas Kraes. O pipol oli sapraes se Sol i bin jenis bigwan. Blong ful laef blong hem, oli singaotem Sol se Pol. Hem i tijim evri pipol, Ol Jiu mo plante narawan, blong biliv long Jisas. Pol i kam wan Aposol blong Jisas Kraes.

Ol Wok 9:18–22, 29–31; 13:9