Jon 21; Matiu 28:16–20; Mak 16:15–19
Jisas I Askem Ol Aposol blong Hem blong Fidim ol Sipsip blong Hem
Blong soem lav long Jisas i blong tijim ol narawan abaot Hem
Afta we Jisas i laef bakegen long ded, Pita mo sam long ol nara Aposol oli ko sakem net. Nomata se oli sakem net blong ful naet, oli no bin kasem eni fis.
Jon 21:1–3
Long nekis moning, ol Aposol oli luk Jisas long so, be oli no save se Hem i Jisas. Hem i askem sapos oli kasem eni fis. Oli talem se no, oli no kasem eni fis.
Jon 21:4–5
Jisas i talem long ol Aposol ia blong sakem net blong olgeta i go long raet saed blong bot mo bae oli kasem fis. Ol Aposol oli mekem wanem we Jisas i talem, mo moa long wan handred fis oli fulumap net. Net ia i hevi tumas wetem fis i mekem se ol Aposol oli no save pulum i go insaed long bot.
Jon 21:6
Mo afta Jon i luksave huia man ia. Hem i talem long Pita, "Ei, Masta blong yumi ia." Pita i jam i go long wota mo i swim i go long Jisas. Ol nara Aposol oli tekem bot mo fis i kam so. Jisas i stap kukum sam bred mo fis, mo Hem i invaetem ol Aposol blong kakae wetem Hem.
Jon 21:7–13
Afta we oli kakae, Jisas i askem Pita, "?Pita, yu yu lavem me?" Pita i talem yes. Mo afta Jisas i talem, "Ale, yu givim kakae long ol sipsip blong mi."
Jon 21:15
Mo afta Jisas i askem bakegen long Pita sapos Pita i lavem Hem. Mo bakegen, Pita i talem yes. Jisas i talem long hem, "Ale yu givim kakae long ol smol sipsip blong mi."
Jon 21:16
Jisas i askem nambatri taem sapos Pita i lavem Hem. Pita i talem, "Yes Masta, yu save we mi mi lavem yu." Jisas i talem long hem bakegen, "Ale yu givim kakae long ol smol sipsip blong mi." Hem i wantem Pita blong lukaot gud long ol pipol we oli folem Jisas.
Jon 21:17
Sam taem afta, Jisas i askem ol aposol blong Hem blong oli mitim Hem anatp long hil., Long hil ia, Hem i talem long olgeta blong serem gospel blong Hem raon long wol, tijim ol pipol abaot ol komanmen blong Hem, mo baptaesem evriwan we oli biliv. "Bae yufala i kam ol witnes blong mi," Hem i talem. Hem i promes se bae Hem i stap wetem olgeta mo givim paoa long olgeta tru long Tabu Spirit.
Matiu 28:16–20; Mak 16:15–19; Ol Wok 1:8
Afta, Jisas i go antap long skae long wan klaod. Hem i gobak long Papa blong Hem long Heven. Taem ol Aposol oli stap luk Hem i go antap, tu enjel tufala i kamaot long olgeta. Tufala i talem long olgeta se semmak olsem we Jisas i go antap long heven, bae Hem i kambak long wol long semmak fasin ia.
Ol Wok 1:9–11