Fas mo Seken Timoti
Ol Leta i go long Timoti
Pol i givim kaonsel long yangfala fren blong hem
Timoti hem i wan yang man we i gat strong fet long Jisas Kraes. Mama blong hem, Yunis, mo apu woman blong hem, Loes, oli ol woman blong bigfala fet tu. Tufala i tijim Timoti abaot ol skripja taem i hem i wan pikinini yet.
2 Timoti 1:5; 3:15
Timoti mo Pol oli ol gud fren. Tufala i bin wok tugeta mo travel tugeta, blong stap givim seves long Lod mo serem gospel blong Hem. Pol i lavem Timoti olsem wan boe blong hem.
Filipae 2:19–22; 1 Timoti 1:2
Pol i askem Timoti blong lidim Jos long Efesas. Pol i mas go long wan nara siti. Taem hem i go, hem i raetem wan leta i go long Timoti blong helpem hem.
1 Timoti 1:1–3
Afta, taem Pol i stap long kalabus long Rom, hem i raetem wan nara leta i go long Timoti. Hem i givim woning long Timoti se bae ol hadtaem oli kam. Sam pipol bae oli wantem gowe long trutok mo lavem ol samting blong wol bitim we oli lavem God. Bae oli tijim ol samting we oli no tru.
2 Timoti 3:1–7; 4:3–4
Pol i talem long Timoti blong i no fraet. Hem i talem se, “Spirit ia we God i givim long yumi, hem i no blong mekem yumi fraet; Spirit ia i blong mekem yumi gat paoa, mo i blong mekem yumi lavem ol man.” Pol i talem long Timoti blong gohed blong stap mekem ol samting we hem i bin lanem. Ol skripja bae oli lidim hem i go long Jisas Kraes.
2 Timoti 1:7–9; 3:14–17
Pol i save se bae hem i ded i no longtaem. Be hem i no fraet blong ded. Pol i talem long Timoti se nomata we hem i bin go tru plante jalenj long laef blong hem, hem i bin holemtaet strong fet blong hem. Hem i trastem se Papa long Heven mo Jisas Kraes bae oli Tufala i givim hem laef we i no save finis.
2 Timoti 4:6–8