Konilias mo Ol Fren blong Hem Oli Kasem Tabu Spirit

Konilias hem i wan lida blong ol Rom solda. Hem mo famli blong hem oli biliv long God, be oli no ol man Jiu mo oli no save abaot Jisas Kraes. Konilias i serem wanem we hem i gat wetem olgeta we oli nogat samting mo samtaem, hem i stap prea long God.

Ol Wok 10:1–2

Long wan aftenun, wan enjel i kam long Konelias taem hem i stap fast mo prea. Enjel ia i talem, “Konilias, God i harem finis ol prea blong yu,.” God i bin luk kaen fasin blong hem. Enjel i talem long Konilias blong go faenem Aposol Pita, we i stap stap long wan siti we oli singaotem Jopa. Pita bae i talem long Konilias, wanem blong mekem.

Ol Wok 10:3–6, 30–32

Konilias i talem long ol wokman blong hem abaot wanem enjel i bin talem long hem. Hem i sendem olgeta blong go long Jopa blong askem Pita blong kam visitim hem.

Ol Wok 10:7–8

Long Jopa, Pita i stap long ruf blong haos mo i stap prea. Hem i hanggri mo i wantem go kakae i no longtaem, be afta hem i luk wan visen.

Ol Wok 10:9–10

Pita i luk se i gat wan bigfala kaliko we i kam daon aot long heven, we i fulap long evri kaen animol mo pijin. Afta Pita i harem wan voes we i stap i stap talem long hem se bae hem i kakae ol animol ia. Be ol animol ia oli ol samting we ol man Jiu oli nogat raet blong kakae. Loa blong Moses i talem se ol animol ia oli no klin. Pita i no wantem kakae olgeta.

Ol Wok 10:11–14

Voes ia i talem se sapos God i mekem wan samting i kam klin, oli no mas singaotem se i no klin. Visen ia i ripit tri taem. Pita i tingting se hemia i minim wanem.

Ol Wok 10:15–17

I no longtaem, Spirit i talem long Pita se tri man oli stap lukaotem hem. Spirit i talem, “go wetem trifala, from we mi nomo mi sanem trifala i kam.”

Ol Wok 10:16–21

Ol tri man ia oli ol wokman blong Konilias. Oli talem long Pita abaot enjel we Konilias i bin luk mo oli askem sapos Pita i save kam blong tijim Konilias. Plante taem ol man Jiu oli no stap go insaed long ol haos blong ol pipol we oli no ol Jiu, mo ol Aposol oli no stap tijim gospel long olgeta. Be taem Pita i tingbaot visen blong hem, Pita i disaed blong go.

Ol Wok 10:22, 28

Taem Pita i kam, Konilias i stap wet long hem wetem plante fren mo memba blong famli blong hem. Hem i talem long Pita se oli redi blong harem wanem we God i givim komanmen long hem blong i talem long olgeta.

Ol Wok 10:26, 33

Naoia Pita i andastanem wanem we God i stap tijim long hem long visen blong hem. Pita i talem long evriwan se God i no lavem wan kantri o grup blong pipol, moa bitim ol narawan. God i akseptem eniwan we i folem Hem mo i mekem wanem we i raet. Pita i tijim Konilias mo ol fren mo famli blong hem abaot Jisas Kraes.

Ol Wok 10:34–43

Taem hem i stap tij, Tabu Spirit i stap wetem evriwan we oli stap lisin. Pita i invaetem olgeta blong kasem baptaes long nem blong Jisas Kraes. Pita i lanem se evri pikinini blong God, oli welkam insaed long Jos Ia blong Jisas Kraes. Oli bin prijim gospel blong Jisas Kraes long evriwan.

Ol Wok 10:44–48