Jisas long Getsemane

Jisas mo Ol Aposol blong Hem oli bin go long wan garen we oli singaotem Getsemane. Jisas i askem Pita, Jemes, mo Jon blong folem Hem mo i talem long ol narawan blong oli wet.

Matiu 26:36–37; Jon 18:1

Jisas i talem long Pita, Jemes mo Jon se hem i stap harem nogud. Hem i askem olgeta blong wekap wetem Hem taem Hem i stap prea.

Matiu 26:38

Afta Jisas i wokbaot i go longwe smol insaed long garen. Hem i stat blong safa from ol sin blong yumi blong mekem se yumi save sakem sin mo kasem fogivnes. Jisas i bin filim tu evri soa blong yumi long bodi, evri sik, mo evri harem nogud, blong mekem se bae Hem i save olsem wanem blong helpem yumi. Hem i bin mekem hemia from Hem i lavem yumi. Evri samting ia oli pat blong plan blong Papa long Heven.

Matiu 26:39; Luk 22:41; Ol Rom 3:23; Alma 7:11–13; 3 Nifae 27:19

Jisas i safa mo i soa tumas long bodi blong Hem mekem se Hem i askem Papa long Heven sapos Hem i save karemaot soa ia long Hem. Be Hem i wantem blong mekem wanem we Papa blong Hem i nidim Hem blong mekem. Hem i talem, “I no olsem tingting blong mi, be mekem olsem tingting blong yu nomo.”

Luk 22:42

Jisas i go luk Pita, Jemes mo Jon mo Hem i luk se oli stap silip. Hem i wekemap olgeta mo askem olgeta bakegen blong wekap mo prea. Be Hem i save se nomata se oli wantem blong wekap, oli bin taet tumas.

Matiu 26:40–41

Jisas i prea bakegen. Wan enjel i kam blong givim paoa long Hem. Hem i filim tumas soa long bodi, mo Hem i prea moa strong. Swet blong Hem hem i ol drop blong blad we i stap foldaon long graon.

Matiu 26:42; Luk 22:43–44; Mosaea 3:7; Doktrin mo Ol Kavenan 19:16–19

Tu taem, Jisas i bin go luk Pita, Jemes mo Jon mo Hem i luk se oli stap silip. Long en, Hem i wekemap olgeta, from se hem i taem blong bae oli karemaot Hem i go.

Matiu 26:43–46