Luk 24:13–25
Jisas i Kamfotem Tu Disaepol
Wan wokbaot tugeta long rod blong go long Emeas
Long dei we Jisas i laef bakegen long ded, tu disaepol tufala i stap wokbaot long Jerusalem i go long wan taon we oli singaotem Emeas. Tufala i bin stap folem Jisas, mo tufala i harem nogud (from Jisas i ded). Tufala i stap storian abaot ded blong Jisas mo ol nara samting we oli bin hapen long sam dei we i pas.
Luk 24:13–14
Taem tufala i stap wokbaot, Jisas i kam mo i wokbaot wetem tufala, be tufala i no save se Hem i Jisas. Hem i askem setufala stap tokbaot wanem mo from wanem tufala i harem nogud.
Luk 24:15–17
Tufala i sapraes se Hem i no save wanem we i bin hapen. Tufala i tokbaot long Hem abaot Jisas. Oli ting se bae Hem i Sevya blong olgeta, be afta Hem i ded.
Luk 24:18–21
Tufala i talem tu se sam woman oli bin go long tumb blong Hem, be bodi blong Jisas i nogat. Ol enjel oli talem long ol woman ia se Jisas i laef.
Luk 24:21–24
Mo afta Jisas i tijim long tufala wanem we ol skripja oli talem abaot Sevya. Hem i talem se ol profet oli bin tijim se Sevya bae i ded mo bae i girap bakegen long ded.
Luk 24:25–27
Taem oli go kasem Emeas, ples i stap tudak nao. Tufala disaepol ia i invaetem Jisas blong stap wetem tufala. Jisas i sidaon blong kakae wetem tufala. Hem i tekem bred, i blesem, mo i givim long tufala disaepol ia. Long taem ia, tufala i save se man ia Hem i Jisas. Mo wantaem nomo Hem i lus.
Luk 24:29–31
Tufala disaepol ia i tokbaot hao tufala i filim long hat blong tufala taem Jisas i stap tijim tufala ol skripja. Tufala i hariap i gobak long Jerusalem blong talem long ol narafala disaepol se tufala i bin luk Jisas.
Luk 24:32–35