Hem I Laef Bakegen Long Ded

Ol disaepol blong Jisas oli putum bodi blong Hem insaed long tumb. Oli wantem mekem moa blong lukaot gud long bodi blong Hem, be kolosap taem blong Sabat nao. Oli mekem plan blong kambak afta we Sabat i pas blong finisim.

Luk 23:52–56

Long eli moning long namba tri dei afta long ded blong Jisas, Meri Magdala wetem ol narawan oli go long tumb.

Luk 24:1; Jon 20:1

Taem oli kasem tumb ia, oli luk se wan man i rolemaot ston we i blokem tumb ia finis. Oli go insaed long tumb, be bodi blong Jisas i nogat.

Luk 24:1; Jon 20:1

Meri i ron i go talem long Pita mo Jon se wan man i bin karemaot bodi blong Jisas. Pita mo Jon tufala i ron i go long tumb.

Jon 20:2–4

Taem oli go kasem tumb, Pita mo Jon tufala i go insaed. Tufala i luk se bodi blong Jisas i nomo gat. Kaliko we oli kavremap Hem long hem i stap yet long ples ia.

Jon 20:5–7

Pita mo Jon tufala i gobak long haos, be Meri i stanap aotsaed long tumb mo i stap krae. Hem i lukluk i go insaed long tumb mo i luk tu enjel. Tufala i askem hem from wanem hem i stap krae. Hem i talem se wan man i bin karemaot bodi blong Jisas, mo hem i no save se i stap wea.

Jon 20:11–13

Mo afta Jisas i kam, be Meri i no save se man ia Hem i Jisas. Jisas i askem long hem, "Woman. Yu stap krae from wanem?" Meri i ting se man ia i man blong lukaot long garen ia. Meri i askem Hem sapos Hem i save ples we bodi blong Jisas i stap long hem.

Jon 20:14–15

Jisas i talem, "Meri." Meri i tanem hem raon. !Naoia nao hem i luksave se i Jisas! Hem i talem long Hem, "Masta" Jisas i askem hem blong i talem long ol nara disaepol se Hem i mas go long Papa blong Hem long Heven. Meri i faenem ol nara disaepol mo i talem long olgeta se hem i bin luk Jisas mo !Hem i laef bakegen long ded!

Jon 20:16–18

Long naet ia, plante long ol Aposol oli stap tugeta. Oli sarem ol doa, oli fraet se ol lida blong ol man Jiu bae oli faenem olgeta. I no longtaem, oli luk Jisas i stanap long medel blong olgeta. Faswan, oli bin fraet. Oli ting se Hem i wan spirit. Jisas i talem, "Pis i stap wetem yufala."

Luk 24:33–38; Jon 20:19

Jisas i invaetem ol Aposol blong tajem ol han mo leg blong Hem. Hem i wantem olgeta blong save se Hem i gat wan bodi blong mit mo bun, be i no wan spirit nomo. Hem i iven kakae fish mo hani wetem olgeta. !Ol disaepol oli glad tumas blong luk Hem!

Luk 24:39–44; Jon 20:20

Mo afta Jisas i helpem ol Aposol blong Hem blong oli andastanem ol skripja we oli tijim abaot ded mo Laef Bakegen long Ded blong Hem. Hem i wantem blong oli tijim evriwan se tru long Hem, oli save sakem sin mo kasem fogivnes. Ol Aposol bae oli stanap olsem ol witnes blong Hem.

Luk 24:44–48

Aposol Tomas i no bin stap long taem ia we Jisas i bin kam. Tomas i talem se bae Hem i no save bililvim se Jisas i laef sapos hem i no luk ol mak blong nil long ol han blong Hem.

Jon 20:24–25

Eit dei afta we ol disaepol oli kam tugeta. Jisas i kamkamaot long olgeta bakegen. Long taem ia Tomas i stap.

Jon 20:26

Jisas i invaetem Tomas blong tajem soa long saed blong Hem mo mak blong nil long ol han blong Hem. Hem i talem long Tomas, “Yu mas bilif long mi. Yu nomo hafhaf long bilif blong yu.” Tomas i talem, "Yu yu Masta blong mi, mo yu God blong mi." Naoia Tomas i bilivim se Jisas i laef bakegen long ded. Jisas i talem se ol pipol oli kasem blesing taem oli biliv, iven taem oli no luk Hem.

Jon 20:27–29