Boe Ia Jisas

Jisas i groap long taon blong Nasaret wetem Meri mo Josef. Long ol taem ia, Hem i lanem moa abaot Papa long Heven. Hem i rere long wok we Papa long Heven i wantem Hem blong mekem.

Luk 2:39–40; Doktin mo Ol Kavenan 93:12–14

Taem Jisas Kraes i gat 12 yia, Hem wetem famli mo ol fren blong Hem i go long Jerusalem blong selebretem Pasova. Oli stap long ples ia blong samfala dei.

Luk 2:41–43

Long rod blong olgeta i gobak long haos, Josef mo Meri i kam blong luksave se Jisas i no stap wetem tufala. Oli gobak long Jerusalem blong faenem Hem. Tufala i wari tumas.

Luk 2:44–46

Meri mo Josef i faenem Jisas afta long ol tri dei we tufala i stap lukaotem Hem. Hem i stap long tempol, i stap toktok wetem sam tija abaot ol skripja. Ol tija oli stap askem ol kwesting long Hem. Oli sapraes tumas long olsem wanem Jisas i save mo i andastanem!

Matiu 2:46–47; luk long Josef Smit Translesen long futnot, 46c

Meri i talem long Jisas se tufala i wari tumas from tufala i no save faenem Hem. Jisas i talem se Hem i stap mekem wok blong Papa long Heven. Jisas i gobak long Nasaret wetem famli blong Hem. Hem i bin obei long Meri mo Josef.

Luk 2:48-52

Jisas i stap gohed blong lan. Hem i groap moa mo i kam moa strong. Papa long Heven i lavem Hem mo i helpem Hem blong rere long misen blong Hem. Jisas i lavem ol pipol raon long Hem, mo olgeta oli lavem Hem.

Luk 2:52