Parabol blong ol Talen

Blong tij abaot kingdom blong God, Jisas i talem wan parabol. Long parabol ia, wan man i stap rere blong travel i go long wan kantri we i stap longwe. Bifo hem i go, hem i go toktok wetem tri wokman blong hem mo i askem olgeta blong lukaot gud long mane blong hem taem hem i no stap.

Matiu 25:14

Man ia i givim bigfala mane we oli singaotem ol talen, long wanwan long ol wokman blong hem. Long wan wokman hemi givim faef talen. Long wan nara wokman hem i givim tu talen. Mo long las wokman hem i givim wan talen. Afta hem i travel i go.

Matiu 25–15

Wokman ia we i kasem faef talen i bin wok had. Hem i yusum ol talen ia blong winim faef moa.

Matiu 25:16

Wokman ia we i kasem tu talen i bin wok had. Hem i yusum ol talen ia blong winim tu moa.

Matiu 25:17

Wokman ia we i kasem wan talen i digim wan hol mo i berem talen blong hem long graon.

Matiu 25:18

Afta long sam taem, man ia i kambak long wokbaot blong hem. Hem i wantem save wanem nao ol wokman blong hem oli bin mekem wetem ol talen ia we hem i bin givim long olgeta.

Matiu 25:19

Wokman ia we i kasem faef talen mo wokman ia we i kasem tu talen tufala i talem long masta blong tufala olsem wanem tufala i kasem moa long wanem we tufala i bin kasem taem hem i no stap. Masta ia i glad. Hem i talem se from we tufala i bin fetful, bae hem i trastem tufala wetem moa talen blong tufala i lukaot long olgeta. Hem i talem long tufala blong tufala i glad.

Matiu 25:20–23

Wokman ia we i kasem wan talen nomo i talem long masta blong hem se hem i fraet mekem se hem i bin haedem talen ia long graon. Hem i givimbak talen ia long masta.

Matiu 25:24–25

Masta i no hapi long wokman ia. Hem i talem se wokman ia i sud yusum wanem we hem i bin kasem blong winim moa talen. Masta i givim talen ia long wokman ia we i gat ten talen. Masta i wantem blong ol wokman blong hem oli yusum ol talen ia we hem i bin givim long olgeta blong help bildimap kingdom blong hem.

Matiu 25:26-29