Matiu 1; Luk 1
Ol Enjel Oli Visitim Meri Mo Josef
Oli jusum tufala blong lukaotem gud Pikinini blong God
Wan woman, nem blong hem Meri, i stap laef long taon blong Nasaret. Hem i lavem God mo hem i obei ol komanmen blong Hem. Meri i stap rere blong maredem wan man we nem blong hem Josef, we hem tu i lavem God.
Matiu 1:18–19; Luk 1:26–28
Wan dei wan enjel we nem blong hem Gabriel i visitim Meri. Fastaem, Meri fraet tumas. Be Gabriel i talem se God i sendem hem. Bae Meri i no mas fraet. Hem i talem se Meri i spesel tumas long God, mo i no longtaem bae hem i gat wan bebi. Pikinini blong Meri ia bae Hem i Pikinini blong God, Jisas.
Luk 1:26–33
Be Meri i bin konfius. Hem i no maredem Josef yet. ?Olsem wanem nao hem i save gat wan pikinini? Gabriel i eksplenem se bae i hapen tru long paoa blong God. Hem i talem long Meri, “Wetem God evri samting bae i posibol.”
Luk 1:34–37
Meri i gat tingting i stap daon mo i fetful. Hem i talem long Gabriel se hem i wan wokman blong Lod. Hem i glad blong stap olsem mama blong pikinini blong God.
Luk 1:38
Taem Josef i faenemaot se Meri ba i gat wan bebi, hem i harem nogud. Hem i stap wari se bae hem i maredem Meri o no.
Matiu 1:19
Be wan naet long wan drim, enjel i bin visitim Josef. Enjel i talem long Josef se pikinini blong Meri i Pikinini blong God mo Josef bae i singaotem Hem Jisas. Jisas bae i sevem evri man aot long ol sin blong olgeta. Enjel i talem long Josef se hem bae i mas maredem Meri.
Matiu 1:20–23
Josef i mekem wanem we enjel i talem. Josef mo Meri, tufala i mared.
Matiu 1:24
Meri i go blong visitim kasen blong hem Elisabet. Enjel i talem long Meri se Elisabet tu i gat bel, iven we hem i olfala. Hemia i wan narafala merikel blong God. Pikinini boe blong hem bae i groap i kam Jon Baptaes. Taem hem i kasem haos blong Elisabet, Meri i talem halo long hem.
Luk 1:13-17, 36, 39–40
Taem Elisabet i harem Meri, bebi blong hem i jam wetem glad insaed long bel blong hem. Elisabet i fulap wetem Tabu Spirit Hem i save se Meri stap karem Pikinini blong God. Meri mo Elisabet tufala i glad. Hem i presem God long evri gudfala samting we Hem i mekem blong blesem ol pikinini blong Hem.
Luk 1:41–55