Jisas I Kam Insaed long Jerusalem

Hem i kolosap taem blong Pasova, wan impoten lafet blong ol man Jiu. Plante pipol oli go long Jerusalem from Pasova. Jisas mo ol disaepol blong Hem oli go tu. Taem ol pipol oli harem se Jisas i stap kam, oli go blong mitim hem.

Matiu 21:1; Jon 12:12–13

Taem Jisas mo ol disaepol blong Hem oli kam long Jerusalem, Hem i askem olgeta blong karem wan dongki. Plante yia i pas, wan profet i talem se Sevya bae i kam wetem tingting i stap daon mo bae Hem i sidaon antap long wan yang dongki.

Matiu 21:1–7; luk tu long Sekaraea 9:9

Jisas i kam insaed long Jerusalem long wan dongki. Ol pipol oli glad tumas blong luk hem. Oli welkamem Hem olsem wan king. Oli putum lif blong pam tri mo ol klos long graon we Hem i wokbaot long hem, mo oli singaot, “Hosana.” Oli talem tangkyu long God mo singaot “!Hosana! Hae God, yu blesem man ya we i kam long nem blong yu. Yu blesem King ya blong ol laen blong Isrel.”

Matiu 21:8–9; Luk 19:36–38; Jon 12:13

Plante man i stap tingting se wanem i stap hapen long Jerusalem. “Huia hemia?” oli i askem. Ol narafala i ansa se Jisas blong Nasaret.

Matiu 21:10–11

Afta, Jisas i go long tempol. Sam pipol oli stap jenisim mane mo salem ol animol blong oli mekem sakrifaes. Jisas i save se oli no stap ones.

Matiu 21:12

Jisas i no laekem taem oli stap mekem mane long ol pipol we oli wantem wosip long tempol. Hem i mekem olgeta i aot long tempol taem i kapsaedem daon ol tebol blong olgeta. Hem i talem se “Haos blong mi, bambae ol man oli putum nem blong hem se “Haos blong Prea”.’ Be yufala, yufala i stap mekem i kam ples blong haed blong ol man blong stil.”

Matiu 21:12–13; luk tu long Aesea 56:7; Jeremaea 7:11

Pipol we oli blaen o oli no save wokbaot oli kam long Jisas insaed long tempol, mo Hem i hilim olgeta. Ol pikinini oli singaot “Hosana,” oli stap presem Jisas mo talem se Hem i Sevya.

Matiu 21:14–15

Sam long ol pris mo ol tija blong loa oli kros taem oli luk wanem Jisas i stap mekem mo harem wanem ol pikinini oli stap talem. Jisas i rimaenem olgeta abaot wan skripja we God i talem se ol pikinini mo ol smosmol pikinini, be yu yu mekem we olgeta oli save presemgud yu.

Matiu 21:15–16; luk tu long Ol Sam 8:2