Jon Baptaes I Bon I Kam long Wol

Sekaraea mo Elisabet tufala i fetful, mo tufala lavem God. Tufala prea blong gat wan bebi. Naoia tufala i kam olfala be yet, tufala i nogat pikinini.

Luk 1:5–7

Sekaraea i wan pris, mo i stap wok insaed long tempol long Jerusalem. Wan dei oli bin jusum hem blong go laetem kandel we i smel naes insaed long wan tabu rum blong tempol.

Luk 1:8–10

!Kwik taem nomo, Wan enjel i kamkamaot! Sekaraea ia i fraet. Enjel i talem, “Yu no fraet, Sekaraea: from prea blong yu i ansa.” Hem i talem se Sekaraea mo Elisabet bae tufala i gat wan pikinini boe. Bae tufala i singaotem hem Jon. Enjel i talem se Jon i gat wan impoten wok blong mekem. Jon bae i helpem ol pipol blong rere blong akseptem Sevya taem Hem i kam.

Luk 1:12–17

Sekaraea i no save bilivim wanem enjel i stap talem long hem. Hem mo Elisabet tufala i olfala tumas blong gat ol pikinini. Enjel i talem se from Sekaraea i no wantem blong biliv long mesej blong hem, bae hem i nomo save toktok go kasem taem we Jon bae bon.

Luk 1:18–20

Pipol oli stap gat tingting se from wanem Sakaraea i stap longtaem tumas insaed long tempol. Taem hem i aot, hem i nomo save toktok. Oli save talem se wan spesel samting i jes hapen.

Luk 1:21–23

Ol manis i pas, Elisabet i bonem wan bebi, olsem we enjel i bin promesem. Ol famli mo ol fren blong tufala oli glad tumas! Oli kam blong mitim smol bebi ia.

Luk 1:57–59

Olgeta man oli gat tingting ia se bebi ia bae tekem nem blong Sekaraea, papa blong hem. Elisabet i talem, “Nem blong hem i Jon.” Oli askem Sekaraea we i no save toktok yet. Hem i raetem, “Nem blong hem i Jon.” Evriwan i bin sapraes.

Luk 1:59–63

Hariap nomo, Sakaraea i save toktok bakegen. Hem i talem tangkyu long God mo hem i bin fulap wetem Tabu Spirit. Sekaraea i talem long evriwan se God i stap tingbaot ol promes blong Hem long ol pipol blong Hem. Hem i talem se Jon bae i kam wan profet. Jon bae i tijim ol pipol blong sakem sin mo kasem baptaes. Hem bae i helpem olgeta i rere blong lan abaot Jisas Kraes.

Luk 1:64–80