Luk 7:36–50
Jisas I Fogivim wan Woman
“Woman ia i lavem tumas”
Wan man we nem blong hem Saemon i invaetem Jisas blong kam kaekae long haos blong hem. Saemon i wan grup lida blong ol man we oli singaotem olgeta Farasi.
Luk 7:36
Taem oli stap kaekae, wan woman i kam insaed long haos blong Saemon. Hem i bin harem se Jisas i stap insaed ia. Hem i wantem soem gladhat mo lav blong hem long Jisas.
Luk 7:37
Woman ia i krae taem hem i luk Jisas. Hem i wasem leg blong Jisas wetem wota blong ae blong hem. Afta i wapem leg blong Jisas wetem ea blong hem blong mekem se i drae. Hem i kisim leg blong Jisas mo putum senta oel long hem.
Luk 7:38
Saemon i kros from se woman ia i mekem fulap sin. Hem i gat tingting ia se sapos i tru we Jisas i wan man blong God, Hem bae i save se woman ia i mekem plante sin mo bae i no letem woman ia i tajem Hem.
Luk 7:39
Jisas i save wanem tingting blong Saemon. Hem i talem long Saemon se woman ia i wasem leg blong Hem from hem i lavem Hem. Long nomol wei, oli givim wota long wan ges blong i wasem leg blong hem. Saemon i no mekem eni samting olsem blong soem lav blong hem long Jisas.
Luk 7:40–47
Jisas i talem long woman ia se Hem i fogivim ol sin blong hem, from woman ia i lavem Hem mo i gat fet long Hem. Jisas i stap talem long woman ia blong i save go long pis.
Luk 7:47–50