Hibrus 11–12
Stap Laef long Fet long Jisas Kraes
Hem i “hem nomo i stamba blong bilif blong yumi, i stat long stat blong hem gogo i kasem en”
I no oltaem isi blong stap olsem wan man blong folem Jisas Kraes long taem bifo taem Jos i jes stat. Ol pipol oli no laekem ol memba blong Jos mo oli stap jikim olgeta from ol bilif blong olgeta. Pol i wantem blong helpem olgeta blong holemtaet fet blong olgeta long Jisas Kraes.
Hibrus 10:32–39
Pol i raetem wan leta i go long Hibru, o Jiu, Ol Sent. Hem i tijim se fet i minim blong biliv mo hop from wan samting, nomata we yumi no save luk. Eksampol, blong stap gat fet long Jisas Kraes i minim blong stap trastem Hem mo ol promes blong Hem, nomata we yumi no kasem ol blesing we yumi stap hop from.
Hibrus 11:1, 6
Blong helpem Ol Hibru Sent blong go tru long ol hadtaem blong fet blong olgeta, Pol i rimaenem olgeta abaot ol stori blong ol pipol long skripja we oli bin gat bigfala fet.
Hibrus 11:4–40
Eksampol, Pol i tokbaot Noa. God i talem long Noa blong bildim wan ak blong sevem famli blong hem aot long wan bigfala wota we bae i draonem wol. Noa i gat fet blong obei, iven bifo hem i luk ren.
Hibrus 11:7
Pol i storian abaot Ebraham mo Sara, we oli gat fet blong lego hom blong olgeta from se God i promesem blong lidim olgeta i go long wan ples we i moa gud. Oli gat fet tu long promes blong God se bae oli gat wan bigfala famli, nomata we tufala i olfala mo oli nogat pikinini yet.
Hibrus 11:8–16
Pol i storian tu abaot Mama blong Moses, Jokebed. Hem i gat fet blong haedem Moses, taem hem i wan bebi, blong kipim hem i sef long wan rabis king.
Hibrus 11:23
Moses i groap long Ijip. Sapos no bae hem i rij mo stap gud. Be hem i jusum blong givim evri samting ia from se hem i gat fet long God mo ol blesing blong Hem.
Hibrus 11:24–27
From fet blong hem, Moses i lidim ol pipol blong God aot long ples we oli stap long hem olsem ol slef. !Oli iven wokbaot long medel blong Red Si long graon we i drae!
Hibrus 11:29
Pol i storian abaot Rahab. Hem i bin gat fet blong helpem ol pipol blong God, nomata we i nogat wan long siti blong hem i biliv long Lod. Fet blong hem i sevem famli blong hem.
Hibrus 11:30–31
Pol i storian se ol plante eksampol ia blong fet, i save helpem yumi blong gat fet long Jisas Kraes tu, nomata sapos laef i had. Yumi save sakem sin blong yumi mo lukluk long Jisas, we hem nomo i stamba blong bilif blong yumi, i stat long stat blong hem gogo i kasem en. Hem i wantem blong ded from yumi from se Hem i save Atonmen blong Hem !bae i karem bigfala glad mo hiling!
Hibrus 12:1–2