Matiu 12:1–12; Luk 13:10–17
Jisas I Hilim wan Woman long Sabat
Mekem gudfala samting long tabu dei blong Hem
Jisas mo ol disaepol blong Hem oli stap wokbaot krosem wan fil long Sabat dei. Oli hangrre tumas, mekem se oli pikimap sam wit mo oli kakae. Sam lida blong ol man Jiu we oli singaotem olgeta Farasi oli bin luk olgeta. Ol Farasi oli bin mekem plante rul abaot Sabat dei. Blong pikimap wit i agensem rul blong olgeta.
Matiu 12:1–2
Ol Farasi oli askem Jisas from wanem ol disaepol blong Hem oli no kipim Sabat i tabu. Jisas i ansa mo talem se oli no mekem wan samting i nogud. God i givim long yumi Sabat dei blong blesem yumi, i no blong mekem laef blong yumi kam moa had.
Matiu 12:2–8; Mak 2:27
Afta, Jisas i stap tij long haos blong prea long Sabat dei. Jisas i bin luk wan woman long ples ia. Woman ia i no save stanap stret. Hem i gat problem ia blong 18 yia.
Luk 13:10–12
Jisas askem long woman ia blong kam long Hem. Hem i putum han blong Hem long woman ia mo blesem hem.
Luk 13:12–13
Wan taem nomo, woman ia i stanap stret. Ol lida blong haos blong prea oli kros from Jisas i hilim man long Sabat.
Luk 13:13–14
Jisas i se blong helpem woman ia i wan stret samting blong mekem. Hem i stret samting blong mekem long Sabat dei. Ol lida oli sem mo ol pipol long haos blong prea oli glad from woman ia i bin hil.
Luk 13:15–17; luk tu long Luk 6:9