Tru long Kraes, Evriwan Bae I Laef Bakegen long Ded

Sam long ol memba blong Jos long wan siti we oli singaotem Korin mo oli bin gat ol kwestin abaot wanem bae hapen afta we yumi ded. Oli no bin sua se i tru se Jisas i bin girap long ded bakegen. Sam pipol oli talem se i nogat resureksen. Pol i bin harem abaot hemia mo i raetem wan leta i go long Ol Sent long Korin.

1 Korin 15:12–14

Pol i bin raetem se Resureksen blong Jisas Kraes hem i wan impoten pat blong gospel blong Hem. Pol i talem se “Kraes i ded blong tekemaot ol sin blong yumi,” mo “long namba tri dei blong hem, hem i laef bakegen.” Moa long 500 pipol i bin luk Hem afta we Hem i laef bakegen long ded, mo hemia i tekem tu Pol mo ol nara Aposol.

1 Korin 15:1–8

Pol i tijim se sapos Kraes i no bin girap long ded bakegen, bae yumi evriwan i harem nogud mo nogat hop. From Adam i bin Foldaon, yumi evriwan bae i ded, be from Jisas Kraes, !bae yumi evriwan i girap tu long ded!

1 Korin 15:17–22

Pol i rimaenem Ol Sent long Korin se ol pipol oli save stap baptaes long bihaf blong olgeta we oli ded. ?From wanem bae yumi nidim blong mekem hemia sapos ol pipol we oli bin ded bae oli neva girap bakegen long ded? Yumi stap baptaes long bihaf blong ol dedman from yumi save se evriwan bae oli laef bakegen. Hemia i givim janis long olgeta blong kasem ol blesing Lod.

1 Korin 15:29

Sam Sent long Korin oli stap askem se bae bodi blong yumi i olsem wanem taem yumi laef bakegen long ded. Pol i talem se bodi blong yumi bae i kam gud evriwan. Bae oli no slak o sik o kam olfala. Sam pipol bae oli gat ol selestial bodi we i saen olsem san. Ol narawan bae oli saen olsem mun, mo ol narawan bae oli saen olsem sta.

1 Korin 15:35, 40–43; Doktrin mo Ol Kavenan 76:96–98; 88:20–23