Jon 10:1–18
Jisas i Gudfla Man blong Lukaot long Sipsip
“Ol sipsip blong mi oli harem voes blong mi, mo mi save olgeta”
Jisas i bin talem long ol pipol blong Jerusalem se Hem i olsem wan gudfala man blong lukaot long sipsip. Ol disaepol blong Hem, o olgeta we oli folem Hem, oli olsem ol sipsip blong Hem. Gudfala man blong lukaot long sipsip i lavem ol sipsip blong hem. Hem i save nem blong wanwan long olgeta.
Jon 10:3, 14; luk tu long Hileman 15:13
Ol sipsip oli harem save voes blong gudfala man ia blong lukaot long sipsip. Taem hem i singaotem olgeta, oli lisin mo obei.
Jon 10:4, 27
Gudfala man blong lukaot long sipsip i lukaotem gud ol sipsip blong hem. Hem i lidim olgeta i go long ol grin gras, semmak olsem we Jisas Kraes i lidim yumi i go long laef we i no save finis.
Jon 10:9–10, 28
Taem oli pem wan nara man blong lukaot long sipsip, ol sipsip oli no folem hem from oli no harem save voes blong hem. Taem i gat denja, man ia we oli pem hem i ronwe. Hem i no wantem save long ol sipsip olsem we gudfala man blong lukaot long sipsip i lukaotem gud olgeta.
Jon 10:5, 12–13
Gudfala man blong lukaot long sipsip i no save ronwe taem i gat denja. Hem i stap blong protektem ol sipsip blong Hem. Iven Hem i wiling blong givim laef blong hem from olgeta, semmak olsem we Jisas Kraes i bin givim laef blong Hem from yumi blong mekem se yumi save kasem laef we i no save finis.
Jon 10:11, 17-18
Jisas i bin talem long ol pipol blong Jerusalem se Hem i gat sam narafala sipsip we oli stap long ol nara ples. Jisas i bin talem se bae Hem i visitim olgeta tu, mo we bae oli harem ol tijing blong Hem. Buk blong Momon i talem se Jisas i bin visitim sam long ol nara sipsip blong Hem long Amerika.
Jon 10:16; 3 Nifae 15:11–24