Matiu 13
Jisas I Tijim abaot Graon, Ol Sid, Bred, mo Ol Pel
Ol simpol stori ia oli helpem yumi blong andastanem ol trutok long saed bong spirit
Jisas i oltaem i talem ol stori we oli singaotem ol parabol. Long ol parabol Jisas i komparem ol samting we i hapen evridei wetem ol trutok abaot gospel blong Hem. Blong andastanem ol parabol, ol man we oli folem Hem oli lisin gud mo tingting hevi abaot ol mining blong olgeta. Ol parabol ia i helpem olgeta blong lanem abaot kingdom blong God.
Matiu 13:3, 10–15
Long wan parabol, wan man i go long fil blong planem sam sid. Hem i sakem plante sid krosem fil. Ol sid ia oli go olbaot long defren kaen blong graon.
Matiu 13:3
Sam long ol sid ia oli foldaon long wan rod we i gat fulap ston mo oli no save gro. Ol pijin oli kam mo oli kaekae ol sid long graon ia.
Matiu 13:4
Sam long ol sid ia oli foldaon long graon we ston i fulap mo graon i smol. Sid i gro hariap, be rus blong hem i no save gro from fulap ston tumas. Taem ples i hot tumas, ol plan ia oli ded.
Matiu 13:5–6
Sam long ol sid ia oli foldaon long ples we i gat fulap ropnil. From ol ropnil ia ol sid oli no save gro.
Matiu 13:7
Ol narawan oli foldaon long gud graon. Oli kam ol strong mo helti plan. Oli gro i antap mo karem plante frut.
Matiu 13:8 .
Blong helpem ol disaepol blong Hem i andastanem, Jisas i eksplenem wanem mining blong parabol ia. Ol sid ia oli ol toktok blong God. Ol defren graon ia oli olsem ol hat blong ol pipol mo ol defren wei we oli ak taem oli harem ol tokok blong God. Gudfala graon i olgeta we oli harem toktok blong God, oli andastanem, mo oli obei long Hem.
Matiu 13:18–23
Blong tij abaot olsem wanem kingdom blong God bae i gro, Jisas i talem abaot wan sid blong nabangga. Hem i smol nomo, be i gro i kam wan tri we ol bijin i save laef long hem.
Matiu 13:31–32
Jisas i talem tu se kingdom blong God i olsem wan is we wan woman i yusum blong mekem bred. Hem i nidim nomo wan smol is blong mekem wan flaoa blong bred i raes.
Matiu 13:33
Jisas i talem wan nara stori abaot wan man we i pem ol pel. Hem i faenem wan we i naes tumas mo i gat valiu. Hem i salem evri samting we hem i gat blong pem pel ia. Jisas i talem hemia blong tijim se ol blesing blong gospel oli gat valiu tumas mekem se yumi mas mekem evri samting blong kasem olgeta.
Matiu 13:45–46