Jisas I Hilim wan Woman mo Mekem Gel blong Jaeres I Laef Bakegen

Wan man we nem blong hem Jaeras wetem waef mo gel blong tufala, oli stap long wan taon kolosap long Solwota blong Galili. Jaeras i wan lida long haos blong prea, ples we ol man Jiu oli stap go long hem blong wosipim God.

Mak 5:22

Gel blong Jaeras, we i gat 12 yia, i bin sik tumas. Kolosap bae hem i ded. Jaeras i save se gel blong hem i nidim help. Hem i save tu se Jisas i stap long taon blong olgeta.

Mak 5:22–23

Jaeras i aot long haos blong hem mo faenem Jisas. Hem i nildaon long leg blong Jisas mo askem Hem, blong kam mo hilim gel blong hem. Jaeras i save se se sapos Jisas i blesem gel blong hem, bae hem i laef. Jisas i folem Jaeras i go long haos blong hem. Plante man oli folem Hem.

Mak 5:23–24

Wan woman tu long semmak taon ia i nidim help blong Jisas. Hem i bin sik bigwan blong 12 yia. Hem i spenem evri mani long ol dokta, be nogat wan i save hilim hem—hem i jes sik moa. Hem i save se Jisas i save hilim hem. Be olsem wanem nao bae hem i save kasem Jisas long medel blong plante man olsem?

Mak 5:25–27

Woman ia i bilif se sapos hem i tajem klos blong Jisas nomo bae hem i save hil wantaem. Taem Jisas i wokbaot i kam go, hem i pusum han blong hem blong tajem klos blong Jisas. Taem hem i tajem en blong klos blong Jisas nomo, hem i hil wantaem long sik blong hem.

Matiu 9:20; Mak 5:27–29; Luk 8:44

Stret long taem ia, Jisas i stop blong wokbaot. Hem i filim paoa i go aot long Hem. “?Hu i tajem mi?” Hem i askem. Ol disaepol oli konfius. Plante man oli tajem Hem—from fulap man i stap raon long olgeta. Jisas i luk raon blong luk huia i tajem Hem.

Mak 5:30–32; Luk 8:45

Jisas i luk woman ia we i tajem klos blong Hem. Hem i talem long Jisas abaot sik blong hem, mo se Jisas i bin hilim Hem. Jisas i talem long hem blong i no harem nogud. Woman ia i kasem hiling from fet blong hem long Jisas. Hem i talem long woman ia “Go long pis,”

Mak 5:33–34; Luk 8:47–48

Afta, wan man i kam long haos blong Jaeras, I talem se i let finis: gel blong Jaeras i ded finis. Jaeras i nomo nid blong talem long Jisas blong i kam.

Mak 5:35

Taem we Jisas i harem nius ia, Hem i talem long Jaeras, “Yu no harem nogud, yu bilif long mi nomo” Mekem se oli go long haos blong Jaeras

Mak 5:36–38

Jaeras mo waef blong i lidim Jisas i go long ples we gel blong tufala i slip long hem. Jisas i tekem han blong gel ia mo talem long hem, “Girap.”

Mak 5:41

Hariap nomo, gel blong Jaeras i girap long bed blong hem. Hem i nomo ded! Jisas i askem Jaeras mo waef blong hem blong karem wan kaekae i kam blong gel blong tufala blong i kakae. Oli sapraes tumas long wanem Jisas i mekem long gel blong tufala. Hem talem long olgeta blong oli no mas talemaot merikel ia long ol narawan.

Mak 5:42–43