Parabol blong ol Ten Yang Gel

Oli stap rere blong Jisas i kambak

Ol disaepol blong Jisas oli askem Hem se wetaem bae Hem i kambak.

Ol disaepol blong Jisas oli save se wan dei, afta we Hem i gobak long Papa blong Hem, Jisas bae i kambak long wol. Oli askem Hem olsem wanem nao bae oli save se Hem i stap kambak. Oli wantem blong stap rere from Hem. Blong ansarem olgeta, Jisas i talem wan parabol.

Matiu 24–3

Long parabol ia, ten woman oli stap go long wan mared. Mared ia i tekem ples long naet, mekem se ol woman ia oli mas tekem ol laet we oli fulumap wetem kerosin blong i saenem rod blong olgeta. Faef long ol woman ia oli waes mo oli pem plante kerosin. Ol narafala faef oli no waes mo oli no karem inaf kerosin.

Matiu 25:1–4

Ol woman ia oli wet long man blong mared gogo oli silip.

Ol woman ia oli mas wet blong man blong mared mo lafet blong mared i stat. Be man blong mared i tekem longtaem blong kam. Taem oli stap wet, olgeta evriwan oli silip.

Matiu 25–5

Wan i talem se man blong mared i stap kam.

Long medel naet, wan i singaot se !man blong mared i stap kam! Hem i taem nao blong ol woman ia oli joenem hem long lafet blong mared.

Matiu 25:6

Faef woman oli save laetem ol laet blong olgeta. Ol narafala faef woman oli nogat kerosin.

Evri woman ia oli holem ol laet blong olgeta i go antap blong saenem rod blong olgeta. Be ol faefala woman ia we oli no karem inaf kerosin oli nogat laet. Oli yusum flatem kerosin blong olgeta taem oli stap wet long man blong mared.

Matiu 25:7-8

Ol woman ia we oli nogat kerosin oli go blong pem moa kerosin.

Ol faefala woman ia we oli nogat kerosin oli askem ol narawan blong serem kerosin blong olgeta. Be i nogat inaf kerosin blong oli serem. Ol woman ia we oli nogat kerosin oli kwik blong go pem moa kerosin.

Matiu 25:8-9

Man blong mared i kam mo i toktok long ol faef woman ia we oli rere.

!Taem ol nara faef woman ia oli go, man blong mared i kam! Ol faefala woman we oli rere oli go wetem hem long mared.

Matiu 25:10

Ol faef woman ia we oli go blong pem kerosin oli no save kam long mared.

Taem ol nara faef woman ia oli kambak, oli sarem doa. Oli noknok long doa mo askem man blong mared blong i letem olgeta i go insaed. Be i let finis. Oli nomo save go insaed long mared.

Matiu 25:11-12

Jisas i tijim olgeta we oli stap folem Hem blong stap rere taem Hem i kambak.

Jisas i olsem man blong mared long parabol ia. I nogat man i save taem we bae Hem i kambak. Papa long Heven nomo i save. Mekem se Jisas i talem long olgeta we oli stap folem Hem blong stap rere olsem ol faefala woman ia we oli gat inaf kerosin. Ol pipol we oli obei long ol komanmen blong Lod mo folem Spirit bae oli rere taem Jisas Kraes i kambak bakegen.

Matiu 24:36; 25:13; Doktrin mo ol Kavenan 45:56–57