Las Kakae

Jisas mo ol Aposol blong Hem oli bin stap long Jerusalem blong selebretem lafet ia blong Pasova. Ol man Jiu oli stap selebretem lafet blong Pasova evri yia. Hemia i blong helpem olgeta blong tingbaot se, plante yia i pas, ol famli blong olgeta oli bin ol slef long Ijip, mo God i bin helpem olgeta blong ronwe mo kam fri.

Eksodas 12:27

Taem oli stap long Jerusalem, Jisas mo ol Aposol blong Hem oli bin gat wan spesel lafet tugeta. Jisas i bin luk fored blong serem kakae long lafet ia wetem olgeta.

Luk 22:7–15

Afta we oli finis kakae, Jisas i fulumap wan dis wetem wota. Hem i stat blong wasem leg blong ol Aposol blong Hem.

Jon 13:4–5

Taem hem i taem blong Pita, Pita i askem from wanem Jisas i stap mekem hemia. Blong wasem leg, hem i wan samting we ol wokman nomo oli stap mekem.

Jon 13:6

Jisas i talem se Hem i stap wasem leg blong olgeta blong soem wan eksampol long olgeta. Hem i wantem olgeta blong givim seves mo lavem wanwan long olgeta olsem we Hem i lavem olgeta. Sapos oli mekem hemia, bae ol pipol oli save se olgeta oli ol disaepol blong Hem.

Jon 13:14–16, 34–35

Jisas i talem long ol disaepol blong Hem se bae Hem i ded i no longtaem. Pita i talem se hem i wiling blong ded from Jisas.

Jon 13:36–38

Be Jisas i save se ol hadtaem oli stap kam. Hem i talem long Pita se bifo faol bae i singaot long nekis moning, bae Pita i talem tri taem se hem i no save Jisas.

Jon 13:38

Jisas i save se ol Aposol blong Hem bae oli wari mo fraet. Hem i promes se God bae i sendem Tabu Spirit i kam long olgeta. Tabu Spirit bae i kamfotem, tijim, mo helpem olgeta blong tingbaot wanem we Jisas i bin tijim long olgeta. Hem i talem long olgeta blong oli no wari o fraet. Hem i talem, "Sapos yufala i lavem mi, holem ol komanmen blong mi."

Jon 14:1, 15–16, 26–27

Mo afta Jisas i mekem wan samting we i spesel tumas blong helpem ol Aposol blong Hem oli tingbaot Hem oltaem. Hem i givim sakramen long olgeta. Faswan, Hem i blesem bred, i brekem long ol smol pis, mo i givim long ol Aposol blong Hem. Jisas i talem long olgeta blong oli tingbaot bodi blong Hem taem oli kakae long bred ia. Hem i askem olgeta blong tingbaot se bae Hem i ded from olgeta.

Matiu 26:26; Luk 22:19

Mo afta Jisas i kapsaedem waen i go insaed long wan kap. Hem i blesem waen ia mo i talem long ol Aposol blong oli dring. Jisas i talem long olgeta blong tingbaot blad blong Hem taem oli dring waen ia. Hem i askem olgeta blong tingbaot se bae Hem i safa, blad blong Hem bae i ron mo bae Hem i ded frompein mo ol sin blong evriwan, blong mekem se yumi save sakem sin mo kasem fogivnes.

Matiu 26:27–28; Luk 22:20

Mo afta Jisas i eksplenem se Hem i olsem rop ia grep, mo ol disaepol blong hem oli olsem ol branj blong rop ia. Sapos wan branj i konek wetem rop ia, bae i karem frut. Wan branj we i no konek wetem rop ia, bae i ded mo bae i no save karem frut. Jisas i wantem ol disaepol blong Hem blong oli stap kolosap oltaem long Hem taem oli stap lavem wanwan long olgeta mo kipim ol komanmen blong Hem.

Jon 15:4–12

Afta we Hem i tijim ol samting ia, Jisas mo ol disaepol blong Hem oli singim wan hym. Oli wokbaot i go long wan karen we oli singaotem Getsemane.

Matiu 26:30