Wan Sipsip We I Lus, wan Mane We I Lus, mo Wan Pikinini Boe We I Lus.

Sam long ol lida blong ol man Jiu oli luk Jisas i stap toktok wetem ol pipol we oli tingse oli ol man blong mekem sin. Ol lida oli ting se i rong blong Jisas i kakae wetem ol man we oli gat sin. Jisas i talem long ol lida tri stori o parabol blong helpem olgeta i andastanem se Hem i wantem blong helpem olgeta evriwan blong sakem sin mo olsem wanem Hem i hapi taem oli mekem olsem.

Luk 15:1–3

Fas parabol i abaot wan man we i gat 100 sipsip. Wan long ol sipsip blong hem i lus.

Luk 15:4

Man ia i lego nara 99 sipsip ia mo i go lukaotem hemia we i lus. Hem i gohed blong lukaotem kasem taem we hem i faenem.

Luk 15:4

!Taem we hem i faenem sipsip blong hem ia we i lus, hem i glad tumas. Hem i karem sipsip ia long solda blong hem mo talem long ol fren blong hem mo ol neba blong hem blong oli glad wetem hem. Jisas i talem hemia i olsem wanem Papa long Heven i filim taem wan i sakem sin mo kam long Hem.

Luk 15:5–7

Seken parabol i abaot wan woman we i gat 10 silva mane. Taem hem i lusum wan, hem i laetem wan kandel mo i brum long haos blong hem i stap lukaotem mane ia we i lus. Hem i gohed blong stap lukaotem kasem taem we hem i faenem.

Luk 15:8

Taem we hem i faenem mane blong hem we i lus, !hem i glad tumas! Hem i talem long ol fren mo neba blong hem blong oli glad wetem hem. Jisas i talem hemia i olsem wanem ol enjel long heven oli filim taem wan i sakem sin blong hem.

Luk 15:9–10

Nambatri parabol i abaot wan man we i gat tu boe. Lasbon boe i no wantem blong stap wetem papa blong hem. Hem askem papa blong hem blong givim hem pat blong mane blong hem naoia. Pikinini boe ia i lego haos blong hem mo go long wan kantri longwe tumas.

Luk 15:11–13

Pikinini boe ia i mekem sam joes we i nogud. Hem i westem mane we papa blong hem i givim long hem.

Luk 15:13

Afta we evri mane blong hem i finis, hem i hanggri tumas. I nogat wan man i wantem givim kaekae long hem. Hem i faenem wan wok blong stap fidim ol pig. Pikinini boe ia i hanggri tumas nao hem i wantem tumas blong kakae ol kaekae blong pig. Hem i save se hem i mas gobak long papa blong hem.

Luk 15:14–18

Be pikinini boe ia i no save sapos papa blong hem bae i wantem hem blong kambak. Hem i tingting blong askem papa blong hem blong sapos hem i save kam wokman blong papa.

Luk 15:17–19

Taem pikinini boe ia i stap wokbaot i kambak long haos, papa blong hem i luk hem. !Papa ia i glad tumas, hem i ron i go long boe blong hem!

Luk 15:20

Papa i sidaon mo i putum han blong hem raon long boe blong hem mo kisim hem. Hem i talem long ol wokman blong hem blong karem ol gudfala klos blong boe blong hem mo mekem rere wan lafet. Hem i wantem evriwan blong selebret mo hapi from boe blong hem i kambak hom.

Luk 15:20–24

Long ol taem ia, bigfala boe i bin stap wok long ol plantesen. Taem we hem i kambak long haos, hem i harem miusik mo danis. Hem i askem long wan wokman se wanem ia i stap hapen. Wokman ia i talem long hem se smol brata blong hem i kambak, mekem se oli stap mekem wan lafet.

Luk 15:25–27

Bigfala brata i kros. Papa blong hem i invaetem hem blong go long lafet be hem i no wantem. Hem i talem long papa blong hem se hem i wok blong hem blong plante yia, be i nogat wan i mekem wan lafet blong hem. Papa blong hem i talem long hem, “Wanem mi gat hem i blong yu,” be hem i gud blong yu hapi taem wan i sakem sin mo i kambak hom!

Luk 15:28–32