Ol Wok 16:9–40
Pol mo Saelas
Ol merikel blong Lod i sevem tufala
Lod i singaotem Pol mo Saelas blong go prijim gospel tugeta. Oli travel i go long plante siti blong luk sapos ol nara jos oli oraet i stap.
Ol Wok 15:40–41; 16:4–8
Wan naet, Pol i bin luk wan man blong Masedonia long wan visen, we man ia i stap askem hem blong kam long siti blong hem. Pol mo Saelas i aot kwiktaem. Tufala i save se God i wantem tufala blong go.
Ol Wok 16:9–10
Taem oli kasem Masedonia, wan woman we nem blong hem Lidia, i harem tufala i stap tij. Lod i openem hat blong Lidia. Hem i bilivim wanem Pol i bin tijim mo hem i kasem baptaes.
Ol Wok 16:13–15
Lidia i talem Pol mo Saelas se tufala i save stap long haos blong hem taem tufala i stap long Masedonia.
Ol Wok 16:15
Be i no evriwan i laekem se Pol mo Saelas i stap long we. sam pipol oli no laekem wanem we tufala i stap tijim. Oli tekem Pol mo Saelas i go long ples blong maket mo talem long ol lida blong siti se tufala i stap mekem problem.
Ol Wok 16:16–21
Ol pipol oli kros long Pol mo Saelas. Ol lida blong siti oli teremaot ol klos blong Pol mo Saelas mo talem se oli mas kilim tufala.
Ol Wok 16:22–23
Afta ol lida blong siti oli sakem Pol mo Saelas i go long kalabus. Oli fasem ol leg blong tufala mo oli putum wan soldia i wajem tufala.
Ol Wok 16:23–24
Long naet ia, Pol mo Saelas i bin prea mo singsing ol hym i go long God mo ol nara man long kalabus oli stap lisin long tufala. I no longtaem, graon i stat blong seksek. Ol doa blong kalabus oli open mo ol rop we oli fasem tufala long hem oli slak.
Ol Wok 16:25–26
Solda ia i wekap mo i luk se ol doa oli open. Hem i ting se ol man blong kalabus oli ronwe mo we bae hem i stap long problem from hem i lego olgeta i go. Pol i talem long soldia ia se bae i no wari. Evri man blong kalabus oli stap yet insaed.
Ol Wok 6:27–28
Solda ia i fraet. Hem i nildaon long Pol mo Saelas mo talem, “?Bambae mi mi mekem olsem wanem blong God i sevem mi?” Tufala i talem, “Yu mas bilif long Jisas ya we Masta.”
Ol Wok 16:27–31
Pol mo Saelas i tijim gospel long soldia ia mo famli blong hem. Soldia ia i dresing ol soa blong Pol mo Saelas. Long naet ia, !soldia ia mo famli blong hem i kasem baptaes!
Ol Wok 16:32–33