Sakias, Man blong Kolektem Mane blong Takis

Jisas i bin visitimm taon blong Jeriko. Wan man we nem blong hem Sakias i bin stap long ples ia. Sakias hem i man blong kolektem mane blong takis mo hem i wan rijman. Plante man oli no laekem olgeta we oli stap kolektem mane blong takis. Oli ting se olgeta we oli stap kolektem mane blong takis oli karemaot tumas mane blong ol pipol.

Luk 19:1–2

Sakias i bin harem se Jisas i stap long taon. Hem i wantem blong lanem moa abaot Hem. Hem i traem blong go luk Jisas, be i no save mekem from se i gat tumas man raon long Hem, mo Sakias i sot tumas blong lukluk ova long olgeta. ?Hao nao bae hem i luk Jisas?

Luk 19:3–4

Sakias i ron i go mo i klaem long wan tri blong mekem se hemi save luk Jisas. Taem Jisas i pas, i lukluk i go antap mo i luk Sakias antap long tri. Jisas i singaotem nem blong hem mo i talem, "Yu kamdaon." Jisas i wantem blong visitim hem long haos blong hem. Sakias i hariap i kamdaon long tri. Hem i glad tumas we Jisas i kam long haos blong hem.

Luk 19:4–6

Ol pipol blong Jeriko oli stap askem from wanem Jisas i go long haos blong Sakias. Oli ting se Sakias i wan man blong mekem sin from hem i stap kolektem mane blong takis.

Luk 19:7

Sakias i talem long Jisas, "nara haf blong ol samting blong mi i blong ol puaman." Hem i talem se sapos hem i stilim samting long wan man, bae hem i givimbak moa long hem. Jisas i talem long Sakias, "Tede God i sevem ol man blong haos ya." Jisas i talem se Hem i kam blong lukaotem ol man we oli lus, mo blong sevem olgeta.

Luk 19:6, 8–10