Matiu 5–7
Jisas I Stap Tij Antap long Hil
Helpem yumi kam moa olsem Papa blong yumi long Heven
Jisas mo ol disaepol blong Hem oli go long wan bigfala hil kolosap long Solwota blong Galili. Jisas i tijim olgeta olsem wanem yumi save glad mo kam moa olsem Papa blong yumi long Heven.
Matiu 5:1–12
Jisas i tijim se ol pipol oli kasem blesing mo glad taem oli putum tingting i stap daon, gat wan hat we i klin, mo traem blong mekem wanem we i stret. Ol pipol we oli fogivim ol narawan oli save kasem fogivnes tu. Ol pipol we oli ol man blong putum pis bae oli singaotem olgeta ol pikinini blong God.
Matiu 5:3–9
Jisas i talem se ol disaepol blong hem oli mas stap olsem wan laet long wol ia—olsem wan siti we i stap long wan hil we evriwan i save luk. Yumi no mas haedem laet blong yumi.
Matiu 5:14
Taem yumi folem Jisas, yumi olsem wan kandel we i givim aot laet long evriwan we i stap insaed long rum. Ol gudfala wok blong yumi i save mekem ol pipol i bilif long Papa long Heven.
Matiu 5:15–16
Jisas i talem se yumi mas lavem evri man—iven ol pipol we oli no lavem yumi. Yumi mas prea from olgeta. Jisas i tijim se yumi mas traem blong kam olsem Papa blong yumi long Heven. Hem i tijim se taem yumi helpem ol pipol, yumi no mas talem wanem we yumi mekem long evriwan. God i luk ol gudfala samting we yumi mekem, mo Hem bae i blesem yumi.
Matiu 5:38–48; Matiu 6:1–4
Taem yumi prea yumi no mas wari long wanem ol narafala man oli tingting long yumi. Yumi no mas talem ol semmak toktok evri taem sapos yumi no minim blong talem. Yumi mas talem ol toktok we i kamaot long hat. Papa long Heven i harem ol prea mo i save wanem yumi nidim. Iven sapos i nogat wan i save harem yumi, Hem i save.
Matiu 6:5–8
Jisas i tijim se yumi no mas ting se yumi moa gud long ol nara man. Yumi mas tingbaot se yumi evri wan i gat olgeta jalenj. Yumi mas tingbaot olsem wanem yumi save mekem gud be no jajem olgeta. Yumi mas tritim ol pipol semmak olsem we yumi wantem ol narafala wan blong tritim yumi olsem.
Matiu 7:1–5, 12
Afta Jisas i talem wan stori blong wan man we i no waes we i bildim haos blong hem long sanbij mo wan man we i waes we i bildim haos blong hem long wan ston. Taem strong ren i kam, haos ia we i stap long sanbij i foldaon, mo haos we i stap long ston i stap strong. Jisas i se sapos yumi harem ol tijing blong Hem mo folem, yumi olsem waes man ia.
Matiu 7:24–28