Matiu 10; Luk 5:1–11; 6:12–16
Jisas I Jusum Ol Aposol Blong Hem
Wan invitesen blong stap olsem “ol man blong pulum man ”
Wan dei, ol pipol oli kam long Solwota blong Galili blong harem Jisas tij. Jisas i stap long wan bot mo i stap tijim olgeta we oli staon long so mo oli stap lisin. Bot ia i blong wan man blong pulum fis we nem blong hem i Saemon.
Luk 5:1–3
Taem Jisas i finis tij, Hem i askem Saemon blong tekem bot i go long wan dip pat blong solwota. Hem i talem long Saemon blong putum net blong hem long wota blong kasem sam fis. Saemon i talem se hem i sakem net ful naet ia be i no kasem eni fis. Be from Jisas i askem hem, bae hem i traem bakegen.
Luk 5:4–5
Saemon mo ol fren blong hem oli kasem plante fis mekem se net blong hem i brok. Hem i singaotem ol fren blong hem long nara bot blong kam helpem hem. Hariap nomo ol bot blong olgeta i fulap wetem fis, we mekem kolosap bot i draon. Saemon wetem ol fren blong hem oli sapraes tumas!
Luk5:6–7, 9
Saemon i nildaon long fored blong Jisas. Hem i talem, “Mi wan man we mi mekem sin, O Lod.” Hem i save se God i sendem Jisas. Jisas i talem long hem blong i no mas fraet.
Luk 5:8
Jisas i stap invaetem Saemon, brata blong hem Andru, mo ol fren blong hem Jemes mo Jon, blong folem Hem. Blong oli nomo stap olsem ol man blong pulum fis, be blong oli help blong karem ol man i kam long Jisas.
Mak 1:15–17; Luk 5:10–11
Saemon, Jemes, mo Jon oli lego ol bot blong olgeta mo oli kam ol Aposol blong Jisas. Afta, Jisas i givim nem ia Pita long Saemon. Wan Aposol i wan spesel witnes blong Jisas Kraes. Jisas i singaotem 12 man blong kam ol Aposol blong Hem. Hem i bin prea blong save huia blong singaotem. Jisas i givim ki blong prishud long ol Aposol blong Hem blong oli lidim Jos.
Matiu10; Luk 6:12–16; 9:1–2
From ol Aposol oli gat paoa blong God, oli save hilim ol pipol tu we oli sik, mekem ol pipol oli laef bakegen mo mekem ol narafala merikel.
Matiu 10:8
Jisas i sendem ol Aposol blong Hem blong go long plante siti blong tijim gospel blong Hem. Hem i talem se Tabu Spirit bae i helpem olgeta blong save wanem blong talem. Jisas i talem se sam pipol bae oli no laekem wanem olgeta i tijim, be taem oli fetful blong mekem wok ia, God bae i stap wetem olgeta.
Matiu 10:5–7, 19–22