Jisas I Givim long Ol Aposol blong Hem Ol Prishud Ki

Wan dei, Jisas i askem ol disaepol blong Hem se, ol pipol oli ting se huia Hem. Ol disapol blong Hem oli ansa se sam pipol oli ting se Hem i Jon Baptaes. Ol narafala oli ting se Hem i wan profet long OlTesteman we i kambak.

Matiu 16:13–14

Afta Jisas i askem ol disaepol blong Hem se oli ting se Hem i huia. Pita i ansa, “Yu yu Mesaea ya. Yu yu Pikinini blong God ya we i laef, i stap we i stap.”

Matiu 16:15–16

Jisas i glad blong harem Pita i talem hemia. Hem i talem long Pita se hem i no lanem huia Jisas long ol nara pipol. Papa long Heven nao i talemaot long hem.

Matiu 16:17

Jisas i talem long Pita, ““Bambae mi mi stanemap jos blong mi long ston ya” Afta hem i promes blong givim ol ki blong prishud long Pita, o atoriti we i kam long God, mekem se hem mo ol narafala Aposol oli save lidim Jos Ia blong Hem long wol ia.

Matiu 16:18–19

Sam dei afta, Jisas i tekem Pita, Jemes mo Jon i go long wan hil blong prea.

Matiu 17:1; Luk 9:28

Taem Jisas i stap prea, fes blong Hem i saen olsem san. Iven ol klos blong Hem i saen.

Matiu 17:2; Luk 9:29

Tu profet long OlTesteman, Moses mo Elaeja tufala i kamkamaot. Oli toktok wetem Jisas abaot ded mo Girap Bakegen long Ded blong Hem, we bae i hapen i no longtaem long Jerusalem. Pita i talem long Jisas,“Masta, i gud we mifala i stap long ples ya.”

Matiu 17:3–4; Luk 9:30–33 (luk long Josef Smit Translesen long futnot 31a)

Taem Pita i stap toktok, wan klaod we i saen i raonem olgeta. Oli harem voes blong God i talem se: “Hem, hem i pikinini blong mi we mi lavem tumas, we mi mi glad tumas long hem. !Yufala i lisin gud long hem!” Pita, Jemes, mo Jon oli fraet mo foldaon long ni blong tufala.

Matiu 17:5–6

Jisas i tajem ol Aposol blong Hem, mo talem, “Yufala i girap, yufala i no fraet.” Oli lukluk i go antap. Moses mo Elaeja tufala i go finis. Long hil ia nao, Pita, Jemes, mo Jon oli kasem ol prishud ki we Jisas i promesem long olgeta.

Matiu 17:7–9; luk tu long Doktrin mo Ol Kavenan 27:12–13