Pol I Komperem Jos long Bodi blong Kraes

Korin hem i wan bigfala siti we i bisi. Plante memba blong Jos blong Jisas Kraes oli laef long we. Be oli blong plante defren ples mo oli defdefren. Pol i wantem blong helpem olgeta blong kam wan mo luk gud fasin long ol olgeta wanwan. Mekem se hem i raetem wan leta.

1 Korin 1:11–13

Long leta blong hem, Pol i talem long Ol Sent se olgeta evriwan oli gat ol spesel presen we oli kam long God. Sam pipol oli gat presen we i fet. Ol narawan oli gat presen blong stap mekem ol merikel. Sam oli waes, mo sam oli save hilim ol narawan. Sam pipol oli save toktok ol nara lanwis. Evri Sent oli gat ol defdefren presen, be evriwan i kam long God.

1 Korin 12:3–11, 29–30

Poli i bin tijim se nomata we Ol Sent oli defdefren, fet blong olgeta long Jisas i karem olgeta i kam tugeta. Taem oli disaed blong folem ol tijing blong Jisas, blong kasem baptaes, mo joenem Jos blong Hem, oli kam wan grup we i joen long Jisas Kraes.

1 Korin 12:27

Pol i talem se Jos i olsem wan bodi, we i gat wan hed, ol han, mo ol leg. Evri pat blong bodi i mekem ol defren samting. Sora i no sapos blong filim nogud from se hem i defren long ae. Hed i no save talem long leg se, “Mi mi no wantem yu.” Evri pat hem i impoten, mo evriwan oli wok tugeta.

1 Korin 12:12–14

Pol i singaotem Ol Sent long Korin se oli “bodi blong Kraes.” Hem i wantem olgeta blong wok tugeta olsem ol defdefren pat blong wan bodi, mo yusum ol defdefren presen blong olgeta blong helpem mo blesem wanwan long olgeta.

1 Korin 12:15–27

Blong mekem hemia, ol pipol oli nidim wan spesel kaen lav, we oli singaotem jareti. Hem i lav we Jisas Kraes i gat blong evriwan. Pol i talem se blong stap gat jareti i minim blong gat fasin blong save wet longtaem wetem ol narawan, nomata sapos oli no kaen. Hem i minim blong no stap gat ol nogud fasin, stap selfis, o stap jalus. Hem i minim blong stap lavem trutok mo gat hop.

1 Korin 13:1–7; Moronae 7:47

Pol i talem long Ol Sent long Korin se jareti i stap blong oltaem. Nomata long ol nara presen we yumi gat, yumi evriwan i nidim blong gat jareti. Eniwan long yumi i save gat jareti sapos yumi askem long Papa long Heven wetem ful hat blong yumi mo traem blong stap olsem wan tru man blong folem Jisas Kraes.

1 Korin 13:1–3, 8; Moronae 7:48