Mga Sugilanon sa Balaan nga mga Kasulatan

Sulat halin kay Santiago—Imbitasyon nga tumanon, indi lamang nga pamatian, ang pulong sang Dios

Santiago 1–3

Sulat halin kay Santiago

Imbitasyon nga tumanon, indi lamang nga pamatian, ang pulong sang Dios

Si Santiago anak ni Maria kag isa sa mga utod ni Jesucristo. Si Santiago isa man ka lider sang Simbahan sa Jerusalem. Nagsulat sia sa katawhan sang Dios sa bug-os nga kalibutan agud buligan sila nga magkabuhi sang ebanghelyo ni Jesucristo.

Santiago 1:1

Si Joseph Smith nga nagabasa sang Biblia.

Si Santiago nagsulat, “Kon may yara sa inyo nga nakulangan sing kaalam, papangayoa sia sa Dios.” Pagligad sang madamo nga mga tinuig, isa ka bata nga lalaki nga si Joseph Smith ang nagbasa sining mga pulong kag nagdesisyon nga magpangamuyo parte sa iya mga pamangkot. Si Joseph Smith sang ulihi nagsiling, “Nasalapoan ko ang testimonya ni Santiago nga matuod.” Ginsabat sang Dios ang pangamuyo ni Joseph, kag sabton man Niya ang aton.

Santiago 1:5; Joseph Smith—Kasaysayan 1:11–17, 26

Si Santiago nga nagatudlo sa isa ka grupo sang mga tawo.

Nagsulat man si Santiago nga dapat naton pamatian sing maayo ang ginasiling sang iban nga mga tawo kag tinguhaan nga indi maakig sa ila. Kon akig kita, indi kita makaalagad sa Dios.

Santiago 1:19–20

Bata nga lalaki kag bata nga babayi ang nagapakighambal sa hamtong nga babayi nga may ara sang nagahibi nga lapsag.

Si Santiago nagsiling nga kulang ang pagpamati lang sa pulong sang Dios; kinahanglan man naton ini ipangabuhi. “Magmangin manugtuman kamo sang pulong,” sulat niya, “kag indi manugpalamati lamang.”

Santiago 1:22

Gin-agda sang bata nga lalaki kag bata nga babayi ang hamtong nga babayi kag ang iya lapsag nga magsulod sa isa ka malabaab nga tolda upod sa ila pamilya.

Ang mangin isa ka sumulunod ni Jesucristo masobra pa sa nagatuo lang sa Dios, paathag ni Santiago. Bisan ang yawa nakahibalo nga ang Dios matuod. Kon makakita kita sang mga tawo nga ginatugnawan ukon ginagutom, dapat naton sila hatagan sing panapton kag pagkaon. Dapat naton bisitahan ang mga balo kag mga ilo. “Ang pagtuo nga walay mga binuhatan patay,” sulat ni Santiago.

Santiago 1:27; 2:14–20

Isa ka tawo nga nagatuytoy sa kabayo palayo sa peligro.

Gusto man ni Santiago nga tudloan ang mga Santos sa paghambal sing malulo sa mga tawo. Nagsiling sia nga ang paghalong sa aton mga pulong daw pareho sang pagtuytoy sa kabayo. Mahimo naton tuytuyan ang isa ka dako nga kabayo gamit ang busal, nga ginaangot sa isa ka gamay nga metal sa baba sang kabayo. Ang aton mga pulong mahimo man nga daw kagagmay lang nga bagay, apang mahimo ini mangin gamhanan.

Santiago 3:2–3

Isa ka barko sa tunga sang bagyo, nga ginadala gamit ang isa ka gamay nga timon.

Si Santiago nagsiling nga ang pagkontrol sang aton mga pulong daw pareho sa pagtimon sing isa ka barko. Bisan pa nga ang barko dako kag mabaskog ang hangin, matuytuyan naton ang barko paagi sa pagkontrol sa tuman ka gamay nga timon. Ang timon daw pareho sa aton mga pulong. Kon makontrol naton ang aton ginapanghambal, makahimo kita sing dako nga kinalain!

Santiago 3:4–5

Mga tawo nga nagapakigbais sa Romano nga soldado, nga nagtumba sing pila ka prutas.

Ang indi maayo nga mga pulong, paathag ni Santiago, mahimo mangin pareho sing gamay nga siga nga nagapadako sang kalayo. Madasig ini maglapta kag makatuga sing tuman nga kasakit. Amo ini ang rason kon ngaa importante nga maghalong sa aton mga pulong.

Santiago 3:5–6

Mga bata nga nagahatag sang prutas sa soldado.

Si Santiago nagsulat nga ginagamit naton ang aton mga baba sa pagpangamuyo sa Amay nga Langitnon. Pero kon kaisa ginagamit man naton ang aton mga baba sa paghambal sing mapintas sa iban nga tawo, nga mga anak sang Amay nga Langitnon. Si James nagsiling nga indi dapat nga amo sina.

Santiago 3:9–10

Isa ka matawhay nga talan-awon malapit sa tuburan, nga ara si Santiago nagatudlo sa mga tawo parte sa ebanghelyo.

Agud tudloan ang mga Santos sa paghambal sing malulo nga mga pulong, gintudlo ni Santiago nga ang isa ka tuburan indi makahatag sang pareho nga preska nga tubig kag mapait nga tubig. Ang kahoy nga higera indi makapatubo sang mga olivo, kag ang puno sang ubas indi makapatubo sang mga higera. Sa amo man nga paagi, kon may ara kita sang kaayo kag pagpalangga sa aton mga tagipusuon, ang aton mga pulong dapat maayo kag mapinalanggaon man!

Santiago 3:11–18