Nabanhaw Sia

Ginhamyang sang mga disipulo ni Jesus ang Iya lawas sa lulubngan. Gusto nila kuntani nga himuson pa gid ang Iya lawas, pero halos Adlaw na nga Inugpahuway. Nagplano sila nga magbalik pagkatapos sang Adlaw nga Inugpahuway para tapuson ini.

Lucas 23:52–56

Temprano pa sang aga sang ikatatlo nga adlaw pagkatapos sang kamatayon ni Jesus, nagkadto si Maria Magdalena kag ang iban pa sa lulubngan.

Lucas 24:1; Juan 20:1

Pag-abot nila, nakita nila nga ang bato nga nagatabon sa lulubngan naisdog na. Nagsulod sila sa lulubngan, kag wala na didto ang lawas ni Jesus.

Lucas 24:2–3; Juan 20:1

Nagdalagan si Maria para sugiran si Pedro kag Juan nga may nagkuha sang lawas ni Jesus. Nagdalagan si Pedro kag Juan pakadto sa lulubngan.

Juan 20:2–4

Pag-abot nila sa lulubngan, nagsulod si Pedro kag Juan. Nakita nila nga wala na ang lawas ni Jesus. Ang tela nga ginputos sa Iya ato pa didto.

Juan 20:5–7

Nagpauli si Pedro kag Juan, pero nagpabilin si Maria sa lulubngan, nga nagahibi. Nagtulok sia sa lulubngan kag nakita ang duha ka anghel. Ginpamangkot sia nila kon ngaa nagahibi sia. Siling niya nga may nagkuha sang lawas ni Jesus, kag wala sia makabalo kon diin na ini.

Juan 20:11–13

Dayon nag-abot si Jesus, pero wala makabalo si Maria nga Sia gali ato. Ginpamangkot sia ni Jesus, “Babayi, ngaa bala nagahibi ka?” Abi ni Maria nga Sia ang hardinero. Ginpamangkot niya Sia kon nakahibalo Sia kon diin ang lawas ni Jesus.

Juan 20:14–15

Siling ni Jesus, “Maria.” Nagbalikid sia. Karon nabal-an na niya nga si Jesus ato! Siling niya sa Iya, “Manunudlo.” Ginsugo sia Niya nga hambalan ang iban pa nga mga disipulo nga kinahanglan Niya magkadto sa Iya Amay nga Langitnon. Ginpangita ni Maria ang iban pa nga mga disipulo kag ginsugiran sila nga nakita niya si Jesus kag nga nabuhi Sia liwat!

Juan 20:16–18

Sina nga gab-i, madamo sa mga Apostoles ang nagatililipon. Ginsira nila ang mga puwertahan, nahadlok sila nga basi pangitaon sila sang mga lider sang mga Judio. Gulpi lang, nakita nila si Jesus nga nagatindog sa tunga nila. Sang primero nahadlok sila. Abi nila isa Sia ka espiritu. Siling ni Jesus, “Ang paghidait mangin yara sa inyo.”

Lucas 24:33–38; Juan 20:19

Ginhagad ni Jesus ang mga Apostoles nga hikapon ang Iya mga kamot kag tiil. Gusto Niya nga mabal-an nila nga may lawas Sia, indi lang espiritu. Nagkaon pa Sia gani sang isda kag balay-putyukan. Malipayon kaayo ang mga disipulo nga makita Sia!

Lucas 24:39–44; Juan 20:20

Dayon ginbuligan ni Jesus ang Iya mga Apostoles nga maintiendihan ang balaan nga kasulatan nga nagatudlo parte sa Iya kamatayon kag Pagkabanhaw. Gusto Niya nga itudlo nila sa tanan nga tungod sa Iya, mahimo na sila nga maghinulsol kag mapatawad. Ang Iya mga Apostoles ang Iya mangin mga saksi.

Lucas 24:44–48

Wala si Apostoles Tomas sang nag-abot si Jesus. Siling niya nga indi sia magpati nga buhi si Jesus kon indi niya makita ang mga marka sang lansang sa Iya mga kamot.

Juan 20:24–25

Walo ka adlaw ang nagligad, nagatililipon ang mga disipulo. Nagpakita liwat si Jesus. Sa sini nga tion ara si Tomas.

Juan 20:26

Ginhagad ni Jesus si Tomas nga hikapon ang mga pilas sa Iya mga kamot kag kilid. Ginhambalan Niya si Tomas, “Indi ka na magpangduhaduha, kundi magtuo!” Siling ni Tomas, “Ginuo ko kag Dios ko.” Karon nagapati na si Tomas nga nabanhaw si Jesus. Siling ni Jesus nga ginabugayan ang mga tawo kon magpati sila, bisan pa nga wala nila Sia makita.

Juan 20:27–29