Mga Sulat kay Timoteo

Si Timoteo isa ka pamatan-on nga may mabakod nga pagtuo kay Jesucristo. Ang iya iloy nga si Eunice, kag ang iya lola nga si Loida, mga babayi nga may dako man nga pagtuo. Gintudloan nila si Timoteo halin sa balaan nga mga kasulatan, bisan sang bata pa sia.

2 Timoteo 1:5; 3:15

Maayo nga mag-abyan sanday Timoteo kag Pablo. Upod sila nga nagpangabudlay kag nagbiyahe, nga nagaalagad sa Ginuo kag nagapakigbahin sang Iya ebanghelyo. Palangga ni Pablo si Timoteo nga daw anak.

Filipos 2:19–22; 1 Timoteo 1:2

Ginpangabay ni Pablo si Timoteo nga pangunahan ang Simbahan sa Efeso. Kinahanglan magkadto si Pablo sa iban nga siyudad. Samtang wala sia, ginsulatan niya si Timoteo agud buligan sia.

1 Timoteo 1:1–3

Sang ulihi, sang ginpriso si Pablo sa Roma, ginsulatan niya liwat si Timoteo. Ginpaandaman niya si Timoteo nga magaabot ang mabudlay nga mga tinion. Ang iban nga mga tawo magatalikod sa kamatuoran kag magapalangga sang mga butang sang kalibutan labaw pa sangsa Dios. Nagatudlo sila sang mga butang nga indi matuod.

2 Timoteo 3:1–7; 4:3–4

Ginhambalan ni Pablo si Timoteo nga indi mahadlok. Nagsiling sia, “Ang Dios wala maghatag sa aton sang espiritu sang katalaw; kundi sang gahum, kag sang gugma.” Ginsilingan ni Pablo si Timoteo nga padayon nga himuon ang mga butang nga iya natun-an. Ang balaan nga mga kasulatan magagiya sa iya padulong kay Jesucristo.

2 Timoteo 1:7–9; 3:14–17

Nahibal-an ni Pablo nga malapit na matapos ang iya kabuhi. Pero wala sia nahadlok nga mapatay. Ginsilingan ni Pablo si Timoteo nga bisan pa nga madamo sia sing naagyan nga mga kabudlayan sa iya kabuhi, natipigan niya nga mabakod ang iya pagtuo. Nagsalig sia nga ang Amay nga Langitnon kag si Jesucristo magahatag sa iya sang kabuhi nga wala’y katapusan.

2 Timoteo 4:6–8