Mga Sugilanon sa Balaan nga mga Kasulatan
Nagpili si Jesus sang Iya mga Apostoles—Imbitasyon nga mangin “mga mangingisda sang tawo”

Mateo 10; Lucas 5:1–11; 6:12–16

Nagpili si Jesus sang Iya mga Apostoles

Imbitasyon nga mangin “mga mangingisda sang tawo”

Si Jesus nga nagatudlo sa mga tawo sa Dagat sang Galilea.

Isa ka adlaw, nagkadto ang mga tawo sa Dagat sang Galilea para mamati kay Jesus nga nagatudlo. Gintudloan sila ni Jesus sakay sa baruto samtang nagapamati sila sa baybay. Ang baruto ginapanag-iyahan sang mangingisda nga ginatawag Simon.

Lucas 5:1–3

Si Jesus nga nagapakighambal kay Simon.

Sang matapos si Jesus sa pagtudlo, ginpangabay Niya si Simon nga dalhon ang baruto sa madalom nga bahin sang dagat. Ginhambalan Niya si Simon nga idagdag ang iya pukot sa dagat para manguha sang isda. Siling ni Simon nga bilog nga gab-i na sia nga nagapangisda pero wala gid sia sang hulik. Pero tungod ginhambalan sia ni Jesus, tilawan niya liwat.

Lucas 5:4–5

Si Simon kag ang iya mga abyan nga nakahulik sang madamo nga isda.

Kadamo kaayo sang nahulik ni Simon nga isda nga nagisi ang iya pukot! Gintawag niya ang iya mga abyan sa isa pa ka baruto para buligan sia. Wala madugayi puno-puno na kaayo ang mga baruto sang isda, nag-amat sila lugdang. Nakibot gid si Simon kag ang iya mga abyan!

Lucas 5:6–7, 9

Si Simon nga nagaluhod sa atubang ni Jesus.

Nagluhod si Simon sa atubang ni Jesus. Siling niya, “Ginuo, makasasala ako nga tawo.” Kabalo sia nga si Jesus ginpadala sang Dios. Ginhambalan sia ni Jesus nga indi mahadlok.

Lucas 5:8

Si Jesus nga ginahagad si Simon, Andres, Santiago, kag Juan nga magsunod sa Iya.

Ginhagad ni Jesus si Simon, ang iya utod nga si Andres, kag ang iya mga abyan nga si Santiago kag Juan, nga magsunod sa Iya. Imbes nga magpanghulik sang isda, mabulig sila sa mga tawo nga magpalapit kay Jesus.

Marcos 1:16–17; Lucas 5:10–11

Si Jesus nga ginahatagan ang Iya mga Apostoles sang awtoridad sa priesthood para pangunahan ang Simbahan.

Ginbayaan ni Simon, Santiago, kag Juan ang ila mga baruto kag nangin mga Apostoles ni Jesus. Sang ulihi, ginngalanan ni Jesus si Simon nga Pedro. Ang Apostoles isa ka espesyal nga saksi ni Jesucristo. Nagtawag si Jesus sang 12 ka tawo para mangin Iya mga Apostoles. Nangamuyo Sia para mabal-an kon sin-o ang Iya tawgon. Ginhatagan Niya ang Iya mga Apostoles sang awtoridad sa priesthood para pangunahan ang Iya Simbahan.

Mateo 10; Lucas 6:12–16; 9:1–2

Isa ka Apostoles nga nagaayo sang bata.

Tungod may gahum sang Dios ang mga Apostoles, pwede man sila magpang-ayo sang mga tawo nga nagamasakit, magbanhaw sang mga tawo nga napatay, kag maghimo sang iban pa nga mga milagro.

Mateo 10:8

Si Jesus nga nagatudlo sa isa ka grupo sang mga tawo. Nangakig ang iban nga mga tawo tungod sa Iya mga pinanudlo.

Ginpadala ni Jesus ang Iya mga Apostoles sa madamo nga siyudad para tudloan ang mga tawo sang Iya ebanghelyo. Siling Niya nga buligan sila sang Espiritu nga Balaan para mabal-an kon ano ang ihambal. Siling ni Jesus nga may mga tawo nga indi manamian sang ila ginatudlo, pero kon matutom sila nga magserbisyo, mangin kaupod nila ang Dios.

Mateo 10:5–7, 19–22