Sa Paghiusa sang Pagtuo

Ang mga Apostoles ni Jesus nagwali sang Iya ebanghelyo sa madamo nga mga pungsod. Ang mga tawo nga nagtuo sa ebanghelyo ginbunyagan. Luyag ni Apostoles Pablo nga ang tanan makabatyag nga ginaabi-abi sa Simbahan sang Manluluwas, bisan pa nga halin sila sa lainlain nga mga lugar.

Mateo 28:19–20; Mga Taga-Efeso 2:19

Nagsulat si Pablo sa mga Santos sa Efeso. Nagsiling sia nga sang napatay si Jesus para sa aton, daw pareho nga ginguba Niya ang pader nga nagaseparar sang mga anak sang Dios. Bisan diin sila naghalin, indi na sila mga estranghero. Pwede na nila mabaton ang ebanghelyo kag mangin bahin sang “panimalay sang Dios,” nga daw isa ka dako nga pamilya!

Mga Taga-Efeso 2:11–19

Siling ni Pablo nga ang Simbahan daw pareho sa mabakod nga bilding. Ang mga bilding nagakinahanglan sang mabakod nga pundasyon. Ang pinakaimportante nga bato sa pundasyon amo ang pangulong pamusod nga bato. Ang tanan nga iban pa nga bato nagalinya sa pamusod nga bato. Si Jesucristo ang pangulong pamusod nga bato sang Iya Simbahan.

Mga Taga-Efeso 2:20

Ang iban pa nga pundasyon sang Simbahan amo ang mga propeta kag mga apostoles, nga nagapamatuod parte kay Jesucristo. Ang Ginuo nagaagda man sa aton tanan sa pagbulig tukod sang Iya Simbahan—paagi sa pagtudlo, paagi sa pag-alagad, paagi sa pagpakigbahin sang ebanghelyo, kag sa madamo pa nga mga paagi.

Mga Taga-Efeso 2:20; 4:11–12

Ang Simbahan kinahanglanon, siling ni Pablo, agud buligan ang kada tawo nga makilala si Jesucristo. Ang Simbahan ni Jesucristo ara sa duta karon, nga may malig-on nga pundasyon ni Jesucristo kag sang Iya mga propeta kag mga apostoles. Paagi sa Iya Simbahan, sarang kita magtubo “sa paghiusa sang pagtuo” kag mangin mas pareho kay Jesus.

Mga Taga-Efeso 2:21–22; 4:13