Mga Sugilanon sa Balaan nga mga Kasulatan
Ang Paanggid sang Maayong Samariahanon—Pagpalangga sa aton isigkatawo pareho sang pagpalangga naton sa aton kaugalingon

Lucas 10:25–37

Ang Paanggid sang Maayong Samariahanon

Pagpalangga sa aton isigkatawo pareho sang pagpalangga naton sa aton kaugalingon

Isa ka tawo nga nagapamangkot kay Jesus.

May abogado nga namangkot kay Jesus kon ano ang himuon para makabaton sang kabuhi nga wala katapusan. Ginpamangkot sia ni Jesus kon ano ang nakasulat sa balaan nga mga kasulatan. Siling sang abogado ang balaan nga kasulatan nagasiling higugmaon ang Dios kag higugmaon ang aton isigkatawo. Nagsiling si Jesus husto sia. Dayon namangkot ang abogado, “Sin-o ang akon isigkatawo?” Si Jesus nagsabat paagi sa pagsugid sang isa ka paanggid ukon istorya.

Lucas 10:25–29

Isa ka Judio nga ginsakit sang mga kawatan.

Sa paanggid, isa ka Judio ang nagalakat sa dalan halin sa Jerusalem pakadto sa Jerico. Gulpi lang, may mga kawatan nga nag-abot. Ginkuha nila ang iya mga bayo, ginsakit sia, kag ginbiyaan.

Lucas 10:30

Wala ginsapak sang pari ang pilason nga tawo.

Wala magdugay, may pari nga nagdulhog. Ang pari nagatrabaho sa templo. Nakita niya ang tawo sa dalan pero nag-agi sia sa pihak nga kilid sang dalan.

Lucas 10:31

Wala ginsapak sang Levinhon ang pilason nga tawo.

Dason naglabay naman ang isa ka tawo nga nagatrabaho man sa templo, nga ginatawag Levinhon. Nakita niya ang tawo nga pilason, pero nag-agi man sia sa pihak nga kilid sang dalan.

Lucas 10:32

Natalupangdan sang Samariahanon ang Judio.

Dayon may naglabay nga Samariahanon. Nakita niya nga grabe ang kapilasan sang tawo sa dalanon. Kasami wala nagaayuhay ang mga Samariahanon kag mga Judio. Pero ining Samariahanon gusto gihapon magbulig sa sining tawo.

Lucas 10:33

Ginaatipan sang Samariahanon ang tawo nga Judio.

Gin-atipan sang Samariahanon ang tawo paagi sa pagbutang sang lana kag alak sa kapilasan sang tawo. Ginpasakay niya ang tawo sa iya asno.

Lucas 10:34

Ginadala sang Samariahanon ang Judio nga tawo sa dalayonan.

Gindala sang Samariahanon ang tawo sa dalayonan, sa diin sia makapahuway kag magpaayo. Antes maglakat ang Samariahanon pagkadason nga adlaw, ginhatagan niya sang kuwarta ang tagbalay sang dalayonan kag nagsiling, “Tatapa sia.” Siling sang Samariahanon nga mabalik sia sa pila ka adlaw nga may dala nga dugang nga kuwarta.

Lucas 10:34–35

Ginhambalan ni Jesus ang abogado nga mangin pareho sa Samariahanon.

Sa katapusan sang istorya, ginpamangkot ni Jesus ang abogado. Sin-o ang isigkatawo sang pilason nga tawo? Ang pari, ang Levinhon, ukon ang Samariahanon? Siling sang abogado nga ang nagpakita sang pagpalangga sa tawo—ang Samariahanon. Ginhambalan ni Jesus ang abogado nga maglakat kag mangin pareho sang Samariahanon.

Lucas 10:36–37