Mga Sugilanon sa Balaan nga mga Kasulatan
Si Jesus kag ang Manggaranon nga Pamatan-on—“Ano bala ang himuon ko agud akon maangkon ang kabuhi nga dayon?”

Marcos 10:17–31

Si Jesus kag ang Manggaranon nga Pamatan-on

“Ano bala ang himuon ko agud akon maangkon ang kabuhi nga dayon?”

Pamatan-on nga nagadalagan pakadto kay Jesus.

Samtang nagalakat si Jesus kag ang Iya mga disipulo, may nagadalagan nga manggaranon nga pamatan-on padulong kay Jesus kag nagluhod sa Iya atubang. Ginpamangkot niya si Jesus kon ano ang dapat niya himuon para magpuyo liwat upod sa Amay nga Langitnon.

Marcos 10:17

Ginpadumdom liwat ni Jesus ang pamatan-on sang mga kasugoan.

Ginpadumdom sang Manluluwas ang pamatan-on nga kabalo na sia sang mga kasugoan sang Dios: indi magpatay, indi magbinutig ukon magpangawat, kag tahuron ang imo amay kag iloy.

Marcos 10:19

Nagasabat ang pamatan-on kay Jesus.

Nagsabat ang pamatan-on nga ginatuman niya pirme ining mga kasugoan, halin sang gamay pa sia.

Marcos 10:20

Ginatudloan ni Jesus ang pamatan-on.

Gintulok ni Jesus ang pamatan-on nga may pagpalangga. Ginhambalan Niya sia nga may isa pa sia nga kinahanglan himuon. Kinahanglan niya ibaligya ang tanan niya nga pagkabutang, ihatag ang kuwarta sa mga imol, kag mangin isa sa mga sumulunod ni Jesus. Makabaton na sia dayon sang manggad sa langit!

Marcos 10:21

Nagalakat palayo ang pamatan-on.

Manggaranon kaayo ang pamatan-on. Indi niya gusto nga ihatag ang tanan niya nga pagkabutang. Naglakat sia palayo nga ginasuboan.

Marcos 10:22

Ginpaathag ni Jesus nga kinahanglan naton nga magsalig sa Dios, indi sa manggad.

Siling ni Jesus nga mas mahapos pa sa kamelyo nga magsulod sa buho sang dagom sangsa mga tawo nga nagapalangga sang manggad nga makasulod sa ginharian sang Dios. Nakibot ang mga disipulo. “Sin-o na lang bala ang maluwas?” pamangkot nila. Ginpaathag ni Jesus nga kinahanglan naton nga magsalig sa Dios para maluwas. “Ang tanan nga butang sarang mahimo sang Dios,” siling Niya.

Marcos 10:23–30