Gindakop si Jesus

Pagkatapos ni Jesus nga magpangamuyo kag mag-antos sa Getsemani, nag-abot si Judas upod sang dako nga grupo sang mga gwardiya nga Judio. Isa si Judas sa mga Apostoles. Kabalo sia nga pirme nagakadto si Jesus sa sining hardin. Ginbayaran sang mga lider nga Judio si Judas para buligan sila nga pangitaon si Jesus para makuha nila Sia.

Juan 18:2–3

Sang ginadala na sang mga gwardiya si Jesus, naghunos si Pedro sang espada. Ginlabo niya ang dulunggan sang suluguon sang mataas nga pari.

Juan 18:10

Ginhambalan ni Jesus si Pedro nga taguon ang iya espada. Siling ni Jesus nga kinahanglan Niya himuon ang gusto sang Iya Amay.

Juan 18:11

Gintandog ni Jesus ang dulunggan sang suluguon kag gin-ayo ini.

Lucas 22:51

Gindala sang mga gwardiya si Jesus sa balay sang mataas nga pari. Ara man didto ang iban nga mga lider nga Judio. Gusto nila nga pangitaan sang rason para mapapatay si Jesus. Nagpatawag sila sang mga tawo para magsugid sang binutig parte sa Iya.

Marcos 14:53–61

Sang ulihi, ginpamangkot sang mataas nga pari si Jesus kon Sia Anak sang Dios. Si Jesus nagsiling, “Amo ako.”

Marcos 14:61–62

Ginpaakig sini ang mataas nga pari kag ang iban nga mga lider. Ginsakit nila si Jesus, ginduplaan, kag ginyaguta. Nagsugtanay sila nga dapat Sia patyon.

Marcos 14:63–65

Samtang ara si Jesus sa balay sang mataas nga pari, naghulat si Pedro sa gwa. Nagtupad sia dapit sa kalayo para magpainit-init. Tatlo ka beses, siling sang mga tawo nakilala nila si Pedro bilang isa sang Iya mga disipulo. Pero tagsa ka beses, ginhambal ni Pedro nga indi niya kilala si Jesus.

Marcos 14:54, 66–71

Dayon nagpamalo ang sulog, kag nadumduman ni Pedro ang ginsiling ni Jesus: ipanghiwala Sia ni Pedro sing tatlo ka beses. Naglakat palayo si Pedro nga nagahibi.

Marcos 14:72

Gindala sang Judio nga mga lider si Jesus kay Pilato, ang Romano nga gobernador. Nag-upod man ang guban sang mga tawo. Gusto sang mga lider nga ipapatay ni Pilato si Jesus. Ginhambal nila kay Pilato nga gintawag ni Jesus ang Iya Kaugalingon nga hari sang mga Judio.

Marcos 15:1–3; Lucas 23:2; Juan 18:28–31

Ginpamangkot ni Pilato si Jesus kon Sia ang hari sang mga Judio. Siling ni Jesus, “Ang akon ginharian indi sa sining kalibutan.” Ginpaathag Niya nga nagkari Sia sa kalibutan para magtudlo sa mga tawo sang kamatuoran.

Juan 18:33–37

Siling ni Pilato nga wala sia nagapati nga nakahimo sang sala si Jesus. Pero madamo nga mga tawo ang nagsinggit, “Ilansang sia sa krus.” Nagdesisyon si Pilato nga himuon ang ila gusto kag ipapatay si Jesus.

Marcos 15:12–14; Lucas 23:14–24