Mga Sugilanon sa Balaan nga mga Kasulatan

Ginakomparar ni Pablo ang Simbahan sa Lawas ni Cristo—Pagtudlo parte sa espirituhanon nga mga regalo, paghiusa, kag putli nga paghigugma

1 Mga Taga-Corinto 12–13

Ginakomparar ni Pablo ang Simbahan sa Lawas ni Cristo

Pagtudlo parte sa espirituhanon nga mga regalo, paghiusa, kag putli nga paghigugma

Si Pablo nga nagasulat upod ang katawhan sang Corinto sa likod.

Ang Corinto isa ka dako kag masako nga siyudad. Madamo nga miyembro sang Simbahan ni Jesucristo ang nagaestar didto. Pero sila tanan naghalin sa lainlain nga lugar kag lain gid sa isa kag isa. Gusto sila buligan ni Pablo nga maghiusa kag makita ang maayo nga kinaiya sang isa kag isa. Gani nagsulat si Pablo sa ila.

1 Mga Taga-Corinto 1:11–13

Ang mga tawo sa Corinto nga may lainlain nga mga regalo halin sa Dios.

Sa iya sulat, ginhambalan ni Pablo ang mga Santos nga sila tanan may pinasahi nga mga regalo halin sa Dios. May mga tawo may regalo sang pagtuo. Ang iban may regalo sang paghimo sang mga milagro. Ang iban maalam, kag ang iban makapang-ayo sang iban. Ang iban nga tawo makahambal sang iban nga mga lengguahe. Ang tanan nga Santos may lainlain nga mga regalo, pero ini tanan naghalin sa Dios.

1 Mga Taga-Corinto 12:3–11, 29–30

Si Pablo nagtudlo nga bisan lainlain ang mga Santos sa isa kag isa, ang ila pagtuo kay Jesus nagtingob sa ila. Sang nagdesisyon sila nga magsunod sa mga pinanudlo ni Jesus, magpabunyag, kag magpamiyembro sa Iya Simbahan, nangin isa sila ka grupo, nga nagahiusa kay Jesucristo.

1 Mga Taga-Corinto 12:27

Duha ka tawo nga nagahatagay sang tinapay; duha ka tawo nga upod nga nagalakat; isa ka iloy kag iya mga kabataan.

Si Pablo nagsiling nga ang Simbahan daw pareho sang lawas, may ulo, may mga butkon, mga batiis, kag mga tiil. Ang kada parte sang lawas nagahimo sang lainlain nga butang. Ang dulunggan indi dapat magsunggod tungod lain ini sangsa mata. Kag ang ulo indi makasiling sa mga tiil, “Wala ako sing kinahanglan sa inyo.” Ang kada parte importante, kag ini tanan nagabuligay.

1 Mga Taga-Corinto 12:12–14

Ang mga Santos sa Corinto gintawag ni Pablo nga “ang lawas ni Cristo.” Gusto niya nga magbuligay sila pareho sang lainlain nga mga parte sang lawas, gamit ang ila lainlain nga mga regalo para magbulig kag magpakamaayo sa isa kag isa.

1 Mga Taga-Corinto 12:15–27

Si Pablo nga nagahimo sang sulat; si Jesus nga nagahatag sang tinapay sa isa ka tawo.

Para mahimo ini, kinahanglan sang mga tawo sing espesyal kaayo nga klase sang pagpalangga, nga ginatawag nga putli nga paghigugma. Amo ini ang pagpalangga nga may ara si Jesucristo para sa kada isa sa aton. Siling ni Pablo ang pag-angkon sang putli nga paghigugma nagakahulugan sang pagpasensya sa iban, bisan pa nga indi sila maayo. Nagakahulugan ini nga indi ka bastos, dalok, ukon mahisaon. Nagakahulugan ini sang pagpalangga sang kamatuoran kag pag-angkon sang paglaum.

1 Mga Taga-Corinto 13:1–7; Moroni 7:47

Lalaki nga nagahatag sang tinapay sa babayi.

Ginhambalan ni Pablo ang mga Santos sa Corinto nga ang putli nga paghigugma nagalab-ot hasta sa katubtuban. Bisan ano pa nga regalo ang ara sa aton, tanan kita nagakinahanglan sang putli nga paghigugma. Ang bisan sin-o sa aton sarang makaangkon sang putli nga paghigugma kon pangayuon naton ini sa Amay nga Langitnon sa bug-os naton nga mga tagipusuon kag magtinguha nga mangin matuod nga sumulunod ni Jesucristo.

1 Mga Taga-Corinto 13:1–3, 8; Moroni 7:48