Mga Sugilanon sa Balaan nga mga Kasulatan

Si Jesus Nagatudlo parte sa Duta, mga Binhi, Tinapay, kag mga Perlas—Simple nga mga istorya para buligan kita nga maintiendihan ang espirituhanon nga mga kamatuoran

Mateo 13

Si Jesus Nagatudlo parte sa Duta, mga Binhi, Tinapay, kag mga Perlas

Simple nga mga istorya para buligan kita nga maintiendihan ang espirituhanon nga mga kamatuoran

Si Jesus nga nagatudlo halin sa baruto samtang nagapamati ang mga tawo.

Si Jesus kasami nagagamit sang mga istorya nga ginatawag mga paanggid. Sa mga paanggid, ginkumparar ni Jesus ang adlaw-adlaw nga mga butang sa importante nga mga kamatuoran parte sa Iya ebanghelyo. Para maintiendihan ang mga paanggid, kinahanglan nga mamati sing maayo ang Iya mga sumulunod kag binagbinagon ang mga kahulugan. Ang mga paanggid nagabulig sa ila mga matun-an ang parte sa ginharian sang Dios.

Mateo 13:3, 10–15

Nagsugod si Jesus sa paanggid parte sa tawo nga nagtanom sang mga binhi.

Sa isa ka paanggid, nagkadto ang tawo sa talamnan para mananom sang mga binhi. Ginlapta niya ang madamo nga liso sa bilog nga talamnan. Nagtupa ang mga binhi sa lainlain nga klase sang duta.

Mateo 13:3

Ang iban nga mga binhi nagtupa sa matig-a nga alagyan.

Ang iban nga binhi nagtupa sa matig-a nga alagyan, kon diin indi sila makatubo. Nag-abot ang mga pispis kag ginkaon ang mga liso nga nagtupa didto.

Mateo 13:4

Ang iban nga binhi nagtupa sa batuhon nga duta. Madasig nga nagtubo ang mga binhi, pero indi magdako ang mga gamot tungod sa mga bato. Sang mag-init, nagkalamatay ang mga tanom.

Mateo 13:5–6

Ang iban nga mga binhi nagtupa sa duta nga puno sang hilamon.

Ang iban nga binhi nagtupa sa duta nga puno sang tunukon nga mga hilamon. Tungod sa tunukon nga mga hilamon, indi makatubo ang mga binhi.

Mateo 13:7

Ang iban nga mga binhi nagdalagko nga mabakod nga mga tanom.

Ang iban nga mga binhi nagtupa sa maayo nga duta. Nangin mabakod sila kag matambok nga mga tanom. Namunga sila sing damo.

Mateo 13:8

Ginpaathag ni Jesus nga ang mga binhi daw pareho sa pulong sang Dios.

Para buligan nga makaintiendi ang Iya mga disipulo, ginpaathag ni Jesus kon anong buot silingon sang Iya paanggid. Ang mga binhi daw pareho sa pulong sang Dios. Ang lainlain nga klase sang duta daw pareho sa mga tagipusuon sang tawo kag ang lainlain nila nga reaksyon kon makabati sang pulong sang Dios. Ang maayo nga duta daw pareho sa mga tawo nga nakabati sang pulong sang Dios, naintiendihan ini, kag nagatuman sa Iya.

Mateo 13:18–23

Si Jesus nga nagatudlo parte sa liso sang mustasa.

Para magtudlo kon paano magdako ang ginharian sang Dios, nag-istorya si Jesus parte sa liso sang mustasa. Gamay ini kaayo, pero nagadako para mangin kahoy nga maestaran sang mga pispis.

Mateo 13:31–32

Si Jesus nga nagatudlo parte sa tinapay kag tapay (yeast).

Ginhambal man ni Jesus nga ang ginharian sang Dios daw pareho sang pangpaalsa ukon tapay nga ginagamit sang babayi sa paghimo sang tinapay. Diutay lang nga tapay ang kinahanglan para mag-alsa ang bilog nga tinapay.

Mateo 13:33

Si Jesus nga nagaistorya parte sa paanggid sang perlas.

Nag-istorya si Jesus sang lain nga istorya parte sa isa ka tawo nga nagbakal sang mga perlas. Nakakita sia sang perlas nga katahum kaayo kag mahal. Ginbaligya niya ang tanan niya nga pagkabutang para mabakal niya ang perlas. Gin-istorya ini ni Jesus para magtudlo nga ang mga bugay sang ebanghelyo malahalon kaayo nga dapat naton himuon ang tanan para mabaton ini.

Mateo 13:45–46