Natawo ang Manluluwas

Si Jose kag si Maria nagaestar sa Nazaret. Malapit na nga magbata si Maria. Kinahanglan ang tanan nga magbalik sa ila banwang natawhan para magbayad sang buhis. Buot silingon nga kinahanglan ni Jose kag Maria nga magkadto sa Betlehem, sa banwang natawhan ni Jose. Malayo ang ila biyaheon para makalab-ot didto.

Lucas 2:1–5

Ang biyahe indi mahapos para kay Maria. Tungod kadamo sang mga tawo nga nagkadto sa Betlehem, indi makakita si Maria kag Jose sang lugar nga bataan ni Maria.

Lucas 2:6–7

Nakakita sila sang lugar kon diin kasami ginabutang ang mga kasapatan. Sa sining kubos nga lugar, ginbata si Jesus. Ginpalangga kag gin-atipan ni Maria kag Jose ang lapsag nga si Jesus. Ginputos nila Sia sang tela para mainitan kag mangin komportable Sia. Ginpatulog nila Sia sa pasungan, nga amo pirme ang ginagamit para pakan-an sang mga kasapatan.

Lucas 2:6–7

Sa unhan, may mga bakero nga nagabantay sang ila mga karnero sa kagab-ihon. Gulpi lang, may masilaw nga kasanag nga nagsilak sa ila palibot, kag nagpakita ang isa ka anghel. Ginhadlukan ang mga bakero.

Ginhambalan sila sang anghel nga indi mahadlok, tungod may matahum sia nga balita! Natawo na ang Manluluwas sa Betlehem, kag makita nila sia nga nagahigda sa pasungan. Dayon nag-inabot pa gid ang madamo nga anghel, nga nagasiling, “Himaya sa Dios sa kahitaasan, kag paghidaet sa duta kag maayong kabubut-on sa mga tawo.”

Lucas 2:10–15

Nagdali-dali ang mga bakero sa Betlehem kag nakita ang lapsag nga Jesus, pareho sang ginsiling sang anghel. Ginsugiran nila ang mga tawo sang matahum nga mga butang nga ila nakita kag nabatian. Kabalo sila nga espesyal nga bata si Jesus.

Lucas 2:16–17

Gindala ni Maria kag Jose ang lapsag nga Jesus sa templo para ipresentar Sia sa Dios. Didto nakilala nila ang tawo nga ginatawag Simeon. Ginhambalan sang Balaan nga Espiritu si Simeon nga makilala niya ang Manluluwas antes sia mapatay. Ginkugos niya ang lapsag kag nagsiling nga luwason ni Jesus ang tanan nga anak sang Dios. Nakibot si Jose kag Maria sa iya ginhambal.

Lucas 2:22–35

Sa templo may isa pa ka tawo nga ginatawag Ana. Napatay na ang iya bana madamo nga tinuig ang nagligad. Karon ginausar ni Ana ang tanan niya nga oras sa pagsimba sa Dios sa templo. Ginpasalamatan niya ang Dios sa tsansa nga makilala ang Manluluwas. Kon may makilala sia nga nagahulat sa Manluluwas, ginasugiran niya sila parte kay Jesus.

Lucas 2:36–38

Sang nabata si Jesus, ang mga mago sa lain nga lugar nakakita sang bag-o nga bituon. Kabalo sila nga buot silingon sadto may espesyal nga bata nga natawo nga mangin Anak sang Dios kag Manluluwas sang kalibutan. Nagsugod sila sang malawig nga biyahe para bisitahan ining bata kag simbahon Sia. Gusto nila nga dalhan Sia sang mga regalo para ipakita ang ila pagpalangga sa Iya.

Mateo 2:1–7.

Pagkatapos sang malawig nga pagbiyahe, nakalab-ot ang mga mago sa Jerusalem. Siling nila nga ang bag-o nga hari sang mga Judio, ang Manluluwas, natawo na, kag nagkadto sila para magsimba sa Iya. Namangkot sila kon diin nila makita ang bag-o nga hari.

Mateo 2:1–2

Ang hari nga ginatawag Herodes nakabati nga ginapangita sang mga mago ang bag-o nga hari. Nabalaka sia. Ginhambalan sia sang iya mga pari kag mga escriba nga siling sa balaan nga kasulatan nga ang bag-o nga hari matawo sa Betlehem. Ginsugo ni Herodes ang mga mago nga didto magpangita sa Betlehem kag magbalik sa iya kag ihambal sa iya kon makita na nila ang bag-o nga hari.

Mateo 2:3–8

Nagkadto sa Betlelem ang mga mago. Ginsunod nila ang bituon, nga naggiya sa ila pakadto kay Jesus. Sang makita nila Sia kag si Maria kag Jose, ginhatagan nila si Jesus sang tatlo ka espesyal nga mga regalo kag ginsimba Sia. Ginpaandaman sila sang Dios nga indi magbalik kay Herodes, gani nag-agi sila sa lain nga dalan papauli.

Mateo 2:9–12

Paghalin sang mga mago, nagdamgo si Jose. Sa sina nga damgo, ginhambalan sang anghel si Jose nga nangakig si Herodes. Kinahanglan nga dalhon ni Jose si Maria kag Jesus sa Egipto para mangin hilway sila sa katalagman.

Mateo 2:13

Nagbangon dayon si Jose. Nagkadto sia sa Egipto upod si Maria kag Jesus mientras gab-i pa.

Mateo 2:14

Nagtiner si Maria, Jose, kag Jesus sa Egipto hasta nga ginhambalan sila sang anghel nga napatay na si Herodes kag tawhay na para magbalik. Dayon nagbalik sila kag nag-estar sa Nazaret.

Mateo 2:15, 19–23