Si Jesus sa Punong sang Betesda

Pagpaayo sa tawo nga madugay na nga nagamasakit

Mga tawo nga nagatipon sa Punong sang Betesda.

Sa Jerusalem, may lugar nga ginatawag Punong sang Betesda. Nagapati ang mga tawo nga ining punong may gahum sa pagpaayo. Madamo sang mga tawo nga nagamasakit, bulag, ukon indi makalakat nga nagakadto sa sining punong.

Juan 5:2–3

Mga tawo nga nagalusong sa tubig para mag-ayo.

Nagapati ang mga tawo nga, may mga tiyempo, nga nagapanaog ang anghel kag ginalabugay ang tubig sa punong. Ang una nga tawo nga maglusong sa tubig pagkatapos ini nga labugayon magaayo sa bisan ano nila nga masakit. Madamo nga tawo ang nagatinguha nga makauna lusong sa punong.

Juan 5:4

Masakiton nga tawo nga nagahigda malapit sa punong.

Isa sa mga tawo sa punong amo ang lalaki nga indi makalakat. Nagamasakit sia sa sulod sang 38 na ka tuig. Gusto niya nga maglusong sa punong para mag-ayo, pero tagsa nga tilawan niya, maunahan gid sia pirme sang iban.

Juan 5:5–7

Natalupangdan ni Jesus ang masakiton nga tawo.

Isa ka Adlaw nga Inugpahuway, ara si Jesus sa Jerusalem. Samtang nagalakat Sia sa siyudad, nakalab-ot Sia sa Punong sang Betesda, kag nakita ang tawo nga nagahigda didto.

Juan 5:6

Ginpamangkot ni Jesus ang tawo kon gusto niya nga mag-ayo.

Kabalo si Jesus nga madugay na kaayo nga nagamasakit ang tawo kag indi makalakat. Ginpamangkot sia ni Jesus kon gusto niya nga mag-ayo.

Juan 5:6

Ginhambalan sang tawo si Jesus nga wala sang may magbulig sa iya.

Ginhambal sang tawo kay Jesus nga wala sang may magbulig sa iya nga makalusong sa punong, kag kon ginlabugay ang tubig, maunahan gid sia pirme sang iban sa tubig.

Juan 5:7

Siling ni Jesus sa tawo, “Tindug ka, dalha ang imo higdaan, kag maglakat.” Insigida, nag-ayo ang tawo! Dayon nagtindog sia kag gindala ang iya hiligdaan. Sa una nga beses sa sulod sang 38 ka tuig, makalakat na sia!

Juan 5:8–9

Ginpamangkot sang mga lider ang tawo kon ngaa nga nagatrabaho sia sa Adlaw nga Inugpahuway.

Nakita sang mga lider sang Judio ang tawo nga nagakarga sang iya hiligdaan. Siling nila nga wala niya ginatahod ang Adlaw nga Inugpahuway, tungod para sa ila ang pagkarga sang iya hiligdaan daw pareho lang nga nagatrabaho ka. Ginpaathag sang tawo nga bag-o lang gid sia gin-ayo, kag ang hambal sang tawo nga nag-ayo sa iya nga kargahon ang iya hiligdaan.

Juan 5:10–11

Nangakig ang mga lider kay Jesus kay nagpang-ayo Sia sa Adlaw nga Inugpahuway.

Natukiban sang mga lider nga si Jesus gali ang nag-ayo sa tawo kag naghambal sa iya nga kargahon ang iya hiligdaan sa Adlaw nga Inugpahuway. Nangakig sila kay Jesus kag gusto Sia nga patyon. Ginhambalan sila ni Jesus nga ginahimo lang Niya ang mga butang nga gintudlo sa Iya sang Iya Amay sa Langit.

Juan 5:15–17