Ginhatag ni Jesus ang Iya Kabuhi para sa Aton

Pagkatapos ni Pilato nga magdesisyon nga dapat ilansang sa krus si Jesus, ginhambalan niya ang iya mga soldado nga dal-on si Jesus. Ginbakol nila Sia, ginduplaan, ginbutangan sang korona nga tunok ang Iya ulo, kag ginyaguta Sia.

Marcos 15:15–20

Ginpakarga sang mga soldado si Jesus sang mabug-at nga krus nga kahoy. Gindala nila Sia sa lugar sa gwa lang sang Jerusalem nga ginatawag nga Golgota.

Juan 19:17

Ginlansang sang mga soldado ang mga kamot kag tiil ni Jesus sa krus. Ginpangabay ni Jesus sa Iya Amay nga Langitnon nga patawaron ang mga soldado, tungod wala sila makahibalo nga ginalansang nila sa krus ang Anak sang Dios.

Lucas 23:33–34; tan-awa man sa Joseph Smith Translation sa footnote 34c

Duha ka kriminal ang ginlansang sa krus upod kay Jesus sina nga adlaw. Isa sa ila nagsiling sa Iya, “Indi bala ikaw ang Cristo? Luwasa ang imo kaugalingon kag kami!”

Lucas 23:39

Ang isa ka kriminal naghambal nga bagay lang sa ila ang ila silot, pero si Jesus wala sang ginhimo sang sala. Ginpangabay niya si Jesus nga dumdumon sia sa Iya ginharian. Ginhambalan sia ni Jesus nga sa indi madugay mangin kaupod sila sa kalibutan sang mga espiritu.

Lucas 23:40–43

Madamo nga mga babayi nga nagsunod kay Jesucristo ang nagkadto sa krus para updan Sia. Isa sa mga babayi amo ang iloy ni Jesus, si Maria. Nakita sia ni Jesus kag ginhambalan si Juan, isa sang Iya Apostoles, nga atipanon sia.

Juan 19:25–27; tan-awa man sa Lucas 8:1–3; Marcos 15:40–41

Sa sulod sang tatlo ka oras, nagdulom ang bug-os nga duta. Nasuboan gid kaayo si Jesus. Pamatyag Niya ginbayaan Sia sang Iya Amay sa Langit.

Mateo 27:45–46

Sang ulihi, nahibal-an ni Jesus nga natapos na Niya ang Iya pag-antos. Siling Niya, “Amay, natapos na, natuman na ang imo pagbuot.” Dayon ginduko ni Jesus ang Iya ulo kag ginhatag ang Iya kabuhi. Para mabal-an kon bala patay na gid Sia matuod, gintuslok Sia sang isa ka soldado sang bangkaw sa kilid.

Mga Paglubad ni Joseph Smith, Mateo 27:54 Juan 19:28–30, 34

Sang mapatay si Jesus, nagtay-og ang duta. Nagkalabuka ang mga bato. Ang belo sang templo, ang kurtina nga nagatabon sang pinakasagrado nga lugar sa templo, nagisi sa tunga.

Mateo 27:51

Ginhadlokan ang mga soldado. “Matuod gid nga Anak sia sang Dios,” siling nila.

Mateo 27:54

Ginputos sang mga disipulo ni Jesus ang Iya lawas sang tela kag ginbutang Sia sa lulubngan sa sulod sang hardin. Sang ulihi, ginpaligid nila ang dako nga bato sa atubang sang pwertahan sang lulubngan.

Mateo 27:57–61; Juan 19:38–41