Si Jesus sa Getsemani

Nagkadto si Jesus kag ang Iya mga Apostoles sa hardin nga ginatawag Getsemani. Ginhagad ni Jesus si Pedro, Santiago, kag Juan nga magsunod sa Iya kag ginhambalan ang iban nga maghulat.

Mateo 26:36–37; Juan 18:1

Ginhambalan ni Jesus sanday Pedro, Santiago, kag Juan nga nasuboan Sia. Ginhambalan Niya sila nga magpabilin nga nagabugtaw upod sa Iya samtang nagapangamuyo Sia.

Mateo 26:38

Dayon naglakat pa gid si Jesus sa unhan sa sulod sang hardin. Nagsugod Sia nga mag-antos tungod sa aton mga sala para makahinulsol kita kag mapatawad. Ginbatyag man ni Jesus ang tanan naton nga kasakit, balatian, kag kasubo para mahibal-an Niya kon paano kita buligan. Ginahimo Niya ini tungod palangga Niya kita. Tanan ini parte sa plano sang Amay nga Langitnon.

Mateo 26:39; Lucas 22:41; Mga Taga-Roma 3:23; Alma 7:11–13; 3 Nefi 27:19

Grabe kasakit sang pag-antos ni Jesus nga ginpangabay Niya sa Amay nga Langitnon nga kon pwede kuhaon Niya ang Iya pag-antos. Pero handa Sia nga himuon ang ginapahimo sa Iya sang Iya Amay. Siling Niya, “Indi ang akon pagbuot, kundi ang imo, ang matuman.”

Lucas 22:42

Ginkadtoan ni Jesus si Pedro, Santiago, kag Juan kag naabtan sila nga nagakatulog. Ginpukaw Niya sila kag ginpangabay liwat nga magpabilin nga nagabugtaw kag magpangamuyo. Pero kabalo Sia nga bisan gusto nila nga magbugtaw, kapoy man sila kaayo.

Mateo 26:40–41

Nagpangamuyo liwat si Jesus. Nag-abot ang isa ka anghel para hatagan Sia sing kusog. Grabe ang nabatyagan Niya nga kasakit, kag nagpangamuyo pa gid Sia sing todo. Ang Iya balhas daw mga tinulo sang dugo nga nagakataktak sa duta.

Mateo 26:42; Lucas 22:43–44; Mosias 3:7; Doktrina kag mga Kasugtanan 19:16–19

Duha pa gid ka beses, ginkadtoan ni Jesus si Pedro, Santiago, kag Juan kag naabtan sila nga nagakatulog. Sang ulihi, ginpukaw Niya sila, tungod nag-abot na ang oras nga dakpon na Sia.

Mateo 26:43–46