Mga Sugilanon sa Balaan nga mga Kasulatan
Gin-ayo ni Jesus ang Babayi kag Ginbanhaw ang Bata nga Babayi ni Jairo—“Indi ka magkahadlok, kundi magtuo ka lang”

Marcos 5:21–43

Gin-ayo ni Jesus ang Babayi kag Ginbanhaw ang Bata nga Babayi ni Jairo

“Indi ka magkahadlok, kundi magtuo ka lang”

Si Jairo upod ang iya asawa kag bata nga babayi.

Ang tawo nga ang ngalan Jairo nagaestar upod sa iya asawa kag bata nga babayi sa banwa malapit sa Dagat sang Galilea. Si Jairo lider sang sinagoga, kon diin nagakadto ang mga Judio para magsimba sa Dios.

Marcos 5:22

Nagmasakit sang malubha ang bata nga babayi ni Jairo.

Ang bata nga babayi ni Jairo, nga 12 anyos pa lamang, nagmasakit sing malubha. Malapit na sia mapatay. Kabalo si Jairo nga kinahanglan niya sang bulig. Kabalo man sia nga ara si Jesus sa ila banwa.

Marcos 5:22–23

Ginpangabay ni Jairo si Jesus nga paayuhon ang iya bata.

Naglakat si Jairo kag nakita si Jesus. Nagluhod sia sa tiilan ni Jesus kag ginpangabay Sia nga magkadto para ayuhon ang iya bata nga babayi. Kabalo si Jairo nga kon bendisyunan ni Jesus ang iya bata, mabuhi sia. Ginsunod ni Jesus si Jairo sa ila balay. Guban-guban sang mga tawo ang nagsunod sa Iya.

Marcos 5:23–24

Ang babayi sa kadam-an gusto nga paayuhon ni Jesus.

May babayi sa amo man nga banwa nga nagakinahanglan sang bulig ni Jesus. Malubha ang iya masakit sa sulod sang 12 ka tuig. Naubos na niya ang iya kuwarta sa mga doktor, pero wala gid sang makapaayo sa iya—naglala lang gid ang iya kondisyon. Kabalo sia nga mapaayo sia ni Jesus. Pero paano sia makapalapit sa Iya sa kadamo sang tawo?

Marcos 5:25–27

Jesus Heals Woman Raises Jairus' Daughter

Nagpati ang babayi nga bisan matandog lang niya ang bayo ni Jesus, magaayo sia. Ginlab-ot niya si Jesus sang paglabay Niya. Sang pagtandog gid niya sang sidsid sang Iya bayo, nag-ayo ang iya masakit.

Mateo 9:20; Marcos 5:27–29; Lucas 8:44

Namangkot si Jesus kon sin-o ang nagtandog sa Iya.

Insigida, nag-untat si Jesus sa paglakat. Nabatyagan Niya ang gahum nga naggwa halin sa Iya. “Sin-o ang nagtandog sa akon?” Pamangkot Niya. Naglibog ang ulo sang Iya mga disipulo. Madamo nga mga tawo ang nagtandog sa Iya—ginalibutan sila sang mga tawo. Nanghulong-hulong si Jesus kon sin-o ang nagtandog sa Iya.

Marcos 5:30–32; Lucas 8:45

Ginhambalan ni Jesus ang babayi nga maglakat sa paghidaet.

Nakita ni Jesus ang babayi nga nagtandog sang Iya bayo. Ginsugid sang babayi kay Jesus ang iya masakit, kag nga gin-ayo sia ni Jesus. Ginhambalan sia ni Jesus nga magpakatawhay. Nag-ayo sia tungod sang iya pagtuo sa Iya. “Lakat sa paghidaet,” siling Niya sa iya.

Marcos 5:33–34; Lucas 8:47–48

Nabalitaan ni Jairo nga napatay ang bata niya nga babayi.

Dayon may tinawo nga nag-abot halin sa panimalay ni Jairo. Siling niya nga ulihi na ang tanan: Napatay na ang bata ni Jairo. Indi na dapat isturbuhon ni Jairo si Jesus.

Marcos 5:35

Ginhambalan ni Jesus si Jairo nga magtuo sa Iya.

Pagkatapos nga nabatian ini ni Jesus, siling Niya kay Jairo, “Indi ka magkahadlok, kundi magtuo ka lang.” Dayon nagsulod sila sa balay ni Jairo.

Marcos 5:36–38

Ginsugo ni Jesus ang bata nga babayi ni Jairo nga magbangon.

Gindala ni Jairo kag sang iya asawa si Jesus kon sa diin ang ila bata nga babayi nagahigda. Gin-uyatan ni Jesus ang kamot sang bata nga babayi kag nagsiling sa iya, “Bangon ka.”

Marcos 5:41

Nabuhi liwat ang bata ni Jairo.

Insigida, nagbangon ang bata ni Jairo halin sa iya hiligdaan. Indi na sya patay! Ginpangabay ni Jesus si Jairo kag ang iya asawa nga dalhan sia sang makaon. Nakadayaw sila sa ginhimo ni Jesus para sa ila bata. Ginpangabay Niya sila nga indi pagsugiran ang iban nga mga tawo parte sining milagro.

Marcos 5:42–43