Mga Sugilanon sa Balaan nga mga Kasulatan
Si Juan Bautista Natawo—Gintuman sang Dios ang promisa kay Elisabet kag Zacarias

Lucas 1:5–25, 57–80

Si Juan Bautista Natawo

Gintuman sang Dios ang promisa kay Elisabet kag Zacarias

Si Zacarias kag Elisabet nga nagapangamuyo para mahatagan sang anak.

Si Zacarias kag Elisabet matinuohon nga mga tawo nga nagapalangga sa Dios. Nangamuyo sila para mahatagan sang anak. Karon tigulang na sila kaayo, kag wala sila gihapon sang bata.

Lucas 1:5–7

Si Zacarias nga nagaalagad sa templo.

Si Zacarias isa ka pari nga nagaserbisyo sa templo sa Jerusalem. Isa ka adlaw, sia ang napilian para magsunog sang incienso sa sagrado nga kuwarto sa templo.

Lucas 1:8–10

Isa ka anghel ang nagpakita kay Zacarias.

Gulpi lang, may anghel nga nagpakita. Nahadlok si Zacarias. Siling sang anghel, “Dili ka mahadlok, Zacarias, kay ang imo pag-ampo ginpamatian.” Siling niya si Zacarias kag Elisabet makabata sang lalaki. Dapat nila sia ngalanan nga Juan. Siling sang anghel nga may importante nga buluhaton si Juan. Buligan niya ang mga tawo nga maghanda sa pagbaton sa Manluluwas sa pag-abot Niya.

Lucas 1:12–17

Si Zacarias nga nagaistorya sa anghel.

Indi makapati si Zacarias sa ginahambal sang anghel. Tigulang na sila kaayo ni Elisabet para makabata. Siling sang anghel nga tungod wala nagpati si Zacarias sa iya mensahe, indi sia makahambal hasta nga matawo si Juan.

Lucas 1:18–20

Si Zacarias nga nagapagwa sa templo. Indi sia makahambal.

Natingala ang mga tawo kon ngaa kadugay gid kay Zacarias sa sulod sang templo. Sang paghalin niya, indi sia makahambal. Napaktan nila nga may espesyal gid nga natabo.

Lucas 1:21–23

Si Elisabet kag Zacarias nga nagakugos sang bag-o nila nga bata.

Pila ka bulan ang nagligad, nagbata matuod si Elisabet, pareho sa ginpromisa sang anghel. Nalipay kaayo ang ila pamilya kag mga abyan! Nagkadto sila para makita ang bata.

Lucas 1:57–59

Si Elisabet kag Zacarias nga ginahatagan sang ngalan ang bata.

Abi nila nga Zacarias man ang ingalan sa bata, pareho sang iya tatay. Siling ni Elisabet, “Tawgon sia nga Juan.” Ginpamangkot nila si Zacarias, nga indi pa gihapon makahambal. Ginsulat niya, “Ang iya ngalan si Juan.” Nakibot ang tanan.

Lucas 1:59–63

Si Zacarias nga nagasiling nga ang bata mangin propeta.

Gulpi lang, makahambal na liwat si Zacarias. Ginpasalamatan niya ang Dios kag napuno sia sang Balaan nga Espiritu. Ginhambal niya sa tanan nga gindumdom sang Dios ang Iya mga promisa sa Iya katawhan. Siling Niya nga si Juan mangin propeta. Tudloan ni Juan ang mga tawo nga maghinulsol kag magpabunyag. Buligan niya sila nga maghanda sa pagtuon halin kay Jesucristo.

Lucas 1:64–80