Ang Paanggid sang mga Talento

Ang pagpanginpulos sang ginhatag sang Dios sa aton

Nagaistorya si Jesus sang paanggid parte sa isa ka tawo kag iya mga suluguon.

Para magtudlo parte sa ginharian sang Dios, nag-istorya si Jesus sang isa ka paanggid. Sa paanggid, may isa ka tawo nga nagahanda para maglakat sa malayo nga pungsod. Antes sia maglakat, ginpatawag niya ang tatlo sa iya mga suluguon kag ginpangabay sila nga halungan ang iya kuwarta samtang wala sia.

Mateo 25:14

Ginahatagan sang tawo ang tagsa niya ka suluguon sang mga talento.

Ginhatagan sang tawo ang iya mga suluguon sang dalagko nga balor sang kuwarta nga ginatawag nga mga talento. Ginhatagan niya ang isa ka suluguon sang lima ka talento. Ginhatagan niya ang isa pa gid ka suluguon sang duha ka talento. Kag ginhatagan niya sang ikatatlo nga suluguon sang isa ka talento. Dayon naglakat na sia sa iya kaladtuan.

Mateo 25:15

Ang isa ka suluguon nakaginansya sang lima pa gid ka talento.

Ang suluguon nga nakabaton sang lima ka talento nagtrabaho sing maayo. Gingamit niya ang mga talento para makaginansya sang lima pa gid.

Mateo 25:16

Ang isa ka suluguon nakaginansya sang duha pa gid ka talento.

Ang suluguon nga nakabaton sang duha ka talento nagtrabaho sing maayo. Gingamit niya ang mga talento para makaginansya sang duha pa gid.

Mateo 25:17

Ang isa ka suluguon naglubong sang iya talento.

Ang suluguon nga nakabaton sang isa ka talento nagkutkot sang buho kag ginlubong ang talento sa duta.

Mateo 25:18

Sang ulihi, nagbalik ang tawo halin sa iya ginkadtuan. Gusto niya mabal-an kon ano ang ginhimo sang mga suluguon sa mga talento nga iya ginhatag sa ila.

Mateo 25:19

Nalipay ang tawo sa duha niya ka suluguon.

Ang suluguon nga nakabaton sang lima ka talento kag ang suluguon nga nakabaton sang duha ka talento nanugid sa ila amo kon paano sila nakaginansya sang doble sang wala pa sia. Nalipay gid ang ila amo. Siling niya nga tungod katutom gid sa ila, saligan pa gid niya sila sang mas madamo pa. Ginhambalan niya sila nga magkalipay.

Mateo 25:20–23

Ang ikatatlo nga suluguon naghambal nga gintago niya ang iya talento.

Ang suluguon nga nakabaton sang isa ka talento nanugid sa iya amo nga nahadlok sia, gani gintago niya ang talento sa dalom sang duta. Ginbalik niya ang talento sa iya amo.

Mateo 25:24–25

Wala nalipay ang tawo sa sini nga suluguon.

Wala nalipay ang amo sa sini nga suluguon. Siling niya nga dapat kuntani gingamit niya ang ginhatag sa iya para makaginansya sang dugang nga mga talento. Ginhatag sang amo ang talento sa suluguon nga may pulo ka talento. Gusto sang amo nga gamiton sang iya mga suluguon ang mga talento nga ginhatag niya sa ila para tukuron ang iya ginharian.

Mateo 25:26–29