Pagsalig kay Jesucristo para sa Kaluwasan

Madamo sang mga tawo halin sa nagkalainlain nga lugar nagpamiyembro sa Simbahan ni Jesucristo. Ang mga miyembro sang Simbahan ginatawag nga mga Santos.

Mga Taga-Roma 1:7

Ang iban sang mga Santos, mga Judio nga nagasunod gihapon sa layi ni Moises. Ang iban indi. Nagabaisay sila kon bala kinahanglan nila nga sundon ang layi ni Moises.

Mga Taga-Roma 2:14–15, 23–29

Nakahibalo si Pablo nga ang mga Santos may amo sini nga mga palamangkutanon. Nagsulat sia sa mga Santos sa Roma. Ginsilingan niya sila nga wala sing isa nga maluwas paagi lamang sa pagtinguha nga sundon ang layi ni Moises. Tanan kita nagapakasala, paathag niya. Agud maluwas, ang tanan kinahanglan nga may pagtuo kay Jesucristo kag magsunod sa Iya.

Mga Taga-Roma 3:20–23

Gintudlo ni Pablo nga ginpadala sang Dios si Jesucristo para dalhon ang aton mga sala sa Iya Kaugalingon. Tungod sang sakripisyo ni Jesus, kita tanan sarang maghinulsol kag mapatawad sang aton mga sala.

Mga Taga-Roma 3:24–31

Gintudlo ni Pablo nga si Jesucristo nagahatag sa aton sang regalo sang pagpatawad kag kusog sa paghimo sang maayo nga mga butang. Ining mapinalanggaon nga regalo ginatawag nga grasya ni Jesucristo, kag ini nagapuno sa aton sang paglaum kag kalipay. Siling ni Pablo nga kon kita mabunyagan, pareho kay Jesus, daw pareho lang nga nagasugod kita sang bag-o nga kabuhi bilang sumulunod ni Jesus.

Mga Taga-Roma 5:1–11; 6:3–6