Ginapangunahan sang mga Apostoles ni Jesus ang Iya Simbahan

Sang nagbalik si Jesus sa Iya Amay sa Langit, ang mga Apostoles amo ang nangin mga lider sang Simbahan. Gintudlo nila ang ebanghelyo sang Manluluwas, gin-agda ang mga tawo nga magpamiyembro sa Iya Simbahan, kag naghimo sang madamo nga mga milagro gamit ang gahum sang Dios. Nagpromisa si Jesus nga buligan sila paagi sa pagpadala ang Balaan nga Espiritu.

Mga Binuhatan 1:8–13; 2:41–47

Tungod napatay si Judas, onse na lang ang Apostoles. Nagpangamuyo ang mga Apostoles para mahibal-an kon sin-o ang gusto sang Dios nga ibulos kay Judas kag mangin espesyal nga saksi ni Jesucristo. Ginpili sang Dios ang tawo nga ang ngalan Matias. Nangin isa sia sa Dose ka Apostoles.

Mga Binuhatan 1:15–26

Sa espesyal nga piyesta sang mga Judio, nag-ululupod ang mga disipulo sa Jerusalem. Gulpi lang, daw may hangin nga halin sa langit nga nagsulod sa balay. Nakita nila ang kasanag nga daw kalayo nga nagatungtong sa ila, kag tanan sila napuno sang Balaan nga Espiritu. Tungod sa Balaan nga Espiritu, makahambal sila sa iban nga mga lengguahe.

Mga Binuhatan 2:1–4

Sang mabatian ini sang mga tawo sa Jerusalem, nagtililipon ang mga katawhan. Bisan pa nga ang mga tawo sa grupo naghalin sa madamo nga mga pungsod kag nagahambal sa lainlain nga lengguahe, ang kada isa sa ila nakabati sang ginahambal sang mga Apostoles sa ila kaugalingon nga lengguahe. Nakadayaw gid ang mga tawo!

Mga Binuhatan 2:5–13

Nagtindog si Pedro kag naghambal sa kadam-an. Gin-istorya niya ang parte kay Jesucristo. Naghatag sia sang iya testimonya nga si Jesus amo ang Manluluwas kag nabanhaw Sia.

Mga Binuhatan 2:14–36

Sang mabatian ini sang mga tawo, nabatyagan nila nga kinahanglan nila nga magbag-o. Ginpamangkot nila ang mga Apostoles kon ano ang dapat nila himuon.

Mga Binuhatan 2:37

Siling ni Pedro, “Hinulsol kamo, kag magpabunyag ang tagsa-tagsa sa inyo sa ngalan ni Jesucristo sa kapatawaran sang mga sala, kag mabaton ninyo ang dulot sang Balaan nga Espiritu.” Mga 3,000 ka tawo ang ginbunyagan kag nagpamiyembro sa Simbahan sina nga adlaw.

Mga Binuhatan 2:38–43

Wala madugayi, si Pedro kag Juan nagkadto sa templo. Nakakita sila sang tawo nga indi makalakat. Adlaw-adlaw sia nga nagapungko didto, nga nagapakilimos sa mga tawo.

Mga Binuhatan 3:1–2

Ginpangayoan sang tawo si Pedro kag Juan sang kuwarta. Nagpundo sila kag nagtulok sa iya. Siling ni Pedro, “Tulok ka sa amon.”

Mga Binuhatan 3:3–4

Siling ni Pedro nga wala sila sang pilak ukon bulawan. Pero may ara sila sang mas maayo pa dira. “Sa ngalan ni Jesucristo nga taga-Nazaret,” siling niya, “tindog ka kag maglakat.” Ginbuligan sia ni Pedro nga magtindog. Sa primero nga beses sa iya kabuhi, nakalakat ang tawo! Grabe ang iya kalipay nga naglumpat sia kag naglakat sa sulod sang templo upod ni Pedro kag Juan.

Mga Binuhatan 3:6–8

Nahalawhaw ang mga tawo. Ginhambalan sila ni Pedro nga indi iya gahum ukon gahum ni Juan ang nag-ayo sa tawo. Gin-ayo sia sang gahum ni Jesucristo kag pagtuo sa Iya. Ginhambalan sila ni Pedro nga maghinulsol kag magpati kay Jesus.

Mga Binuhatan 3:9–26

May mga lider sang mga Judio nga wala nanamii sang ginatudlo ni Pedro kag Juan. Siling nila nga wala sang pwede magtudlo parte kay Jesus.

Mga Binuhatan 4:1–18

Siling ni Pedro kag Juan nga tumanon nila ang Dios, kag gusto sang Dios nga tudloan nila ang mga tawo sang ila nabal-an parte kay Jesucristo.

Mga Binuhatan 4:19–20

Padayon nga nagatudlo ang mga Apostoles sang ebanghelyo sang Manluluwas nga may dako nga gahum. Nagadamo nga nagadamo ang nagapamiyembro sa Iya Simbahan. Napuno sila sang Espiritu. Palangga nila ang isa kag isa kag ginapakigbahin ang tanan-tanan. Ginbaligya nila ang ila mga pagkabutang kag ginhatag ang kuwarta sa mga Apostoles para ihatag sa mga imol.

Mga Binuhatan 4:31–37