Ginluwas sang Anghel si Pedro sa Prisohan

Ang Dios nagasabat sang mga pangamuyo

Ang hari nga ang ngalan Herodes wala manamii sa mga Kristiyano. Ginpapatay niya si Apostoles Santiago. Dayon ginpapriso niya si Pedro. Ginbutangan niya sang 16 ka soldado para guwardiyahan ang prisohan.

Mga Binuhatan 12:1–4

Mga tawo nga nagapangamuyo para kay Pedro.

Sang mabatian ini sang mga miyembro sang Simbahan, nangamuyo sila nga nangamuyo sa Amay nga Langitnon para kay Pedro.

Mga Binuhatan 12:5

Isa ka gab-i, nagakatulog si Pedro. Nagaid sia sa duha ka kadena sa tunga sang duha ka soldado.

Mga Binuhatan 12:6

Gulpi lang, may nagsilak nga kasanag sa prisohan, kag nagpakita ang isa ka anghel. “Dali! Bangon ka!” siling sang anghel, kag nahukas ang mga kadena sa mga kamot ni Pedro. Ginhambalan sang anghel si Pedro nga magsunod sa iya.

Mga Binuhatan 12:7–8

Gingiyahan sang anghel si Pedro sa tunga sang mga guwardiya.

Abi ni Pedro nagadamgo lang sia. Ginsunod niya ang anghel sa tunga sang mga guwardiya. Ang salsalon nga puwertahan nga alagyan pakadto sa siyudad nagbukas nga sia lang, kag nag-agi didto si Pedro kag ang anghel.

Mga Binuhatan 12:9–10

Si Pedro nga nagalakat nga isahanon sa siyudad.

Naghalin na ang anghel, kag narealisar ni Pedro nga wala sia nagadamgo. Nahibal-an niya nga ginpadala sang Ginuo ang anghel para luwason sia.

Mga Binuhatan 12:10–11

Si Pedro nga nagapanuktok sa puwertahan sang balay ni Maria.

Naglakat si Pedro sa balay sing isa ka babayi nga ang ngalan Maria, kon diin nagkadto ang madamo nga mga miyembro sang Simbahan para magpangamuyo. Nanuktok sia sa puwertahan.

Mga Binuhatan 12:12–13

Nabatian ni Roda ang tingug ni Pedro sa pihak sang puwertahan.

Ang bata nga ang ngalan Roda ang nag-abri sang puwertahan. Sang mabatian niya ang tingug ni Pedro, grabe gid ang iya kalipay! Nagdalagan sia para sugiran ang iban.

Mga Binuhatan 12:13–14

Ginhambalan ni Roda ang mga miyembro sang Simbahan nga ara si Pedro sa gwa sang puwertahan.

Sang ginsugiran ni Roda ang tanan nga ara si Pedro sa puwertahan, wala sila nagpati sa iya. Padayon nga nagpanuktok si Pedro.

Mga Binuhatan 12:15–16

Ginhambalan ni Pedro ang mga miyembro sang Simbahan nga ginluwas sia sang Ginuo sa prisohan.

Sang ulihi, ginbuksan nila ang puwertahan kag nakita nga matuod gid ini. Hilway na si Pedro sa peligro! Ginsabat sang Ginuo ang ila mga pangamuyo. Ginsugiran ni Pedro ang tanan kon paano sia ginpagwa sang Ginuo sa prisohan.

Mga Binuhatan 12:16–17