Ginapangabay ni Jesus ang mga Apostoles nga Pakan-on ang Iya mga Karnero

Pagkatapos nga mabanhaw si Jesus, naglakat si Pedro kag ang iban nga Apostoles para mangisda. Bisan pa nga nangisda sila sang bilog nga gab-i, wala gid sila sang nakuha.

Juan 21:1–3

Pagkadason nga aga, nakita sang mga Apostoles si Jesus sa baybay, pero wala sila kabalo nga Sia gale ato. Namangkot Sia kon may nakuha sila nga isda. Siling nila wala gid.

Juan 21:4–5

Ginsugo ni Jesus ang mga Apostoles nga iladlad ang ila pukot sa tuo nga bahin sang baruto kag makakuha sila sang isda. Ginhimo sang mga Apostoles ang ginsiling ni Jesus, kag masobra isa ka gatos ka isda ang nagsulod sa pukot! Puno kaayo sang isda ang pukot nga indi ini masarangan batakon sang mga Apostoles pasulod sa baruto.

Juan 21:6

Dayon narealisar ni Juan kon sino atong tawo. Ginhambalan niya si Pedro, “Ang Ginuo ini.” Naglumpat si Pedro sa dagat kag naglangoy pakadto kay Jesus. Gindala sang mga Apostoles ang baruto kag mga isda sa baybay. Nagaluto si Jesus sang tinapay kag isda, kag ginhagad Niya ang mga Apostoles nga magkaon upod sa Iya.

Juan 21:7–13

Pagkatapos nila nga magkaon, ginpamangkot ni Jesus si Pedro, “Ginahigugma mo bala ako sing labi pa sini sa ila?” Nagsiling si Pedro nga huo. Dayon nagsiling si Jesus, “Pahalba ang akon mga kordero.”

Juan 21:15

Dayon ginpamangkot liwat ni Jesus si Pedro kon palangga niya Sia. Sa liwat, nagsiling si Pedro nga huo. Ginsugo sia ni Jesus, “Tatapa ang akon mga karnero.”

Juan 21:16

Ginpamangkot ni Jesus si Pedro sang ikatatlo nga beses kon palangga niya Sia. Siling ni Pedro, “Ginuo, ikaw nakahibalo sang tanan, kag ikaw nakahibalo gid nga ako nagahigugma sa imo.” Ginhambalan sia liwat ni Jesus, “Tatapa ang akon mga karnero.” Gusto Niya nga atipanon ni Pedro ang mga tawo nga nagasunod kay Jesus.

Juan 21:17

Sang ulihi, ginpangabay ni Jesus ang Iya mga Apostoles nga tabuon sia sa isa ka bukid. Didto ginsugo Niya sila nga ipakigbahin ang Iya ebanghelyo sa bilog nga kalibutan, tudloan ang mga tawo sang Iya mga kasugoan, kag bunyagan ang tanan nga magapati. “Mangin saksi ko kamo,” siling Niya. Nagpromisa Sia nga updan Niya sila kag hatagan sila sang gahum paagi sa Balaan nga Esiritu.

Mateo 28:16–20; Marcos 16:15–19; Mga Binuhatan 1:8

Dayon nagkayab si jesus sa langit kag ginlikopan sang panganod. Nagbalik Sia sa Iya Amay sa Langit. Samtang nagatan-aw ang mga Apostoles sa Iya nga nagakayab, nagpakita ang duha ka anghel. Siling nila nga pareho sang pagsaka ni Jesus sa langit, amo man sina ang pagbalik Niya sa duta sa pila ka adlaw.

Mga Binuhatan 1:9–11